ਚੰਡੀਗੜ: ਆਮ ਆਦਮੀ ਪਾਰਟੀ ਨੇ ਕਿਹਾ ਹੈ ਕਿ ਪੰਜਾਬ ਵਿਚ ਪ੍ਰਕਾਸ਼ ਸਿੰਘ ਬਾਦਲ ਦੀ ਸਰਕਾਰ ਲੁੱਟਤੰਤਰ ਦੀ ਸਰਕਾਰ ਬਣਕੇ ਰਹਿ ਗਈ ਹੈ। ਜਿਹੜੇ ਲੋਕ ਬਾਦਲ ਪਰਿਵਾਰ ਦਾ ਜਿੰਨਾ ਜਿਆਦਾ ਕਰੀਬੀ ਹਨ, ਲੁੱਟ ਦੀ ਵਹਿੰਦੀ ਗੰਗਾ ਵਿਚ ਉੱਨੇ ਹੀ ਜਿਆਦਾ ਹੱਥ ਧੋ ਰਹੇ ਹਨ। ਡੇਰਾਬਸੀ ਤੋਂ ਅਕਾਲੀ ਐਮ.ਐਲ.ਏ ਅਤੇ ਮੁੱਖ ਸੰਸਦੀ ਸਕੱਤਰ (ਸੀਪੀਐਸ) ਐਨ.ਕੇ. ਸ਼ਰਮਾ ਇਸਦੀ ਤਾਜਾ ਮਿਸਾਲ ਹੈ। ਜਿਸਨੇ ਬਿਜਲੀ ਦੇ ਬਿੱਲ ਨਹੀਂ ਭਰੇ ਅਤੇ ਉਸਦੀ ਕੰਪਨੀ ਲਗਭਗ 1 ਕਰੋੜ ਰੁਪਏ ਦੀ ਡਿਵਾਲਟਰ ਹੋ ਚੁੱਕੀ ਹੈ, ਫਿਰ ਵੀ ਸਰਕਾਰ ਉਸ ਉਪਰ ਮਿਹਰਬਾਨ ਹੈ।
ਸ਼ੁਕਰਵਾਰ ਨੂੰ ‘ਆਪ’ ਵਲੋਂ ਜਾਰੀ ਪ੍ਰੈਸ ਬਿਆਨ ਵਿਚ ਪਾਰਟੀ ਦੇ ਬੁਲਾਰੇ ਸੁਖਪਾਲ ਸਿੰਘ ਖਹਿਰਾ ਨੇ ਕਿਹਾ ਕਿ ਹੈ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਲਈ ਹਰ ਜਾਇਜ-ਨਜਾਇਜ ਕੰਮ ਕਰਨ ਵਾਲਾ ਐਨ.ਕੇ ਸ਼ਰਮਾ ਸਰਕਾਰੀ ਪੈਸੇ ਦਾ ਫਿਤਰਤੀ ਲੁਟੇਰਾ ਹੈ। ਜਿਸਨੇ ਹੁਣ ਬਿਜਲੀ ਦੇ ਬਿੱਲ ਨਾ ਭਰਕੇ ਸਰਕਾਰੀ ਖਜਾਨੇ ਨੂੰ ਲਗਭਗ ਨੂੰ ਕਰੋੜ ਰੁਪਏ ਦਾ ਚੂੰਨਾ ਲਗਾਇਆ ਹੈ। ਫਿਰ ਵੀ ਬਾਦਲ ਸਰਕਾਰ ਇਸ ਮਾਮਲੇ ਨੂੰ ਨਜਰਅੰਦਾਜ ਕਰਨ ਦੀ ਹਰ ਸੰਭਵ ਕੋਸ਼ਿਸ਼ ਕਰ ਰਹੀ ਹੈ। ਖਹਿਰਾ ਨੇ ਕਿਹਾ ਕਿ ਬਾਦਲ ਦੇ ਰਾਜ ਵਿਚ ਸ਼ਰਮਾ ਦੀ ਤਾਕਤ ਦੀ ਇਸ ਕਦਰ ਤੂਤੀ ਬੋਲਦੀ ਹੈ ਕਿ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮੀਟੇਡ (ਪੀਐਸਪੀਸੀਐਲ) ਨੇ ਡਿਫਾਲਟਰ ਹੋਣ ਦੇ ਬਾਵਜੂਦ ਐਨ.ਕੇ. ਸ਼ਰਮਾ ਦੀਆਂ ਕੰਪਨੀਆਂ ਬਾਰੇ ਸੂਚਨਾ ਦੇ ਅਧਿਕਾਰ ਰਾਹੀਂ ਸੂਚਨਾ ਤੱਕ ਦੇਣ ਤੋਂ ਸਾਫ ਇਨਕਾਰ ਕਰ ਦਿੱਤਾ ਹੈ।
‘ਆਪ’ ਆਗੂ ਨੇ ਕਿਹਾ ਕਿ ਬਾਦਲ ਸਰਕਾਰ ਦੇ ਕਾਰਜਕਾਲ ਦੌਰਾਨ ਰਿਅਲ ਅਸਟੇਟ ਦੇ ਕਾਰੋਬਾਰ ਵਿਚ ਮੋਟੀਆਂ ਧਾਂਦਲੀਆਂ ਕਰਨ ਵਾਲੇ ਐਨ.ਕੇ. ਸ਼ਰਮਾ ਦੀ ਕੰਪਨੀ ਉੱਤੇ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਵਲੋਂ ਦੋ ਮਾਮਲੇ ਦਰਜ ਕੀਤਾ ਜਾ ਚੁੱਕੇ ਹਨ। ਇਸ ਤੋਂ ਇਲਾਵਾ ਐਨ.ਕੇ ਸ਼ਰਮਾ ਨੂੰ ਦਿੱਲੀ ਦੀਆਂ ਚੋਣਾਂ ਵਿਚ ਰੰਗੇ ਹੱਥੀ ਪੈਸੇ ਵੰਡਦੇ ਫੜਿਆ ਜਾ ਚੁੱਕਾ ਹੈ। ਸੁਖਪਾਲ ਖਹਿਰਾ ਨੇ ਕਿਹਾ ਕਿ 2017 ਵਿਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਨ ਪਿੱਛੋਂ ਐਨ.ਕੇ ਸ਼ਰਮਾ ਨਾਲ ਜੁੜੇ ਲੈਣ ਦੇਣ ਦੇ ਸਾਰੇ ਵਿਵਾਦ ਅਤੇ ਸ਼ੱਕੀ ਮਾਮਲੇ ਖੋਲੇ ਜਾਣਗੇ ਅਤੇ ਉਨ੍ਹਾਂ ਦੀ ਬਾਰੀਕੀ ਨਾਲ ਜਾਂਚ ਕਰਵਾਈ ਜਾਏਗੀ। ਖਹਿਰਾ ਨੇ ਕਿਹਾ ਕਿ ਸ਼ਰਮਾ ਝੂਠ ਬੋਲ ਰਹੇ ਹਨ ਕਿ ਉਸਦਾ ਭਾਈ ਹੀ ਸਾਰਾ ਕਾਰੋਬਾਰ ਦੇਖਦਾ ਹੈ। ਖਹਿਰਾ ਨੇ ਕਿਹਾ ਕਿ ਦਰਅਸਲ ਸ਼ਰਮਾ ਸੁਖਬੀਰ ਬਾਦਲ ਦਾ ‘ਖਾਸ ਬੰਦਾ ਹੈ’ ਜਿਸਨੂੰ ਅਕਾਲੀ ਕਹਿਣਾ ਵੀ ਠੀਕ ਨਹੀਂ ਹੋਵੇਗਾ। ਖਹਿਰਾ ਨੇ ਇਹ ਵੀ ਕਿਹਾ ਕਿ ਸ਼ਰਮਾ ਉਹ ਸ਼ਖਸ਼ ਹੈ ਜਿਸਨੇ ਆਪਣੇ ਰਾਜਨੀਤਿਕ ਗੁਰੂ ਅਤੇ ਘਾਗ ਅਕਾਲੀ ਲੀਡਰ ਕੈਪਟਨ ਕੰਵਲਜੀਤ ਸਿੰਘ ਦੀ ਪੀਠ ਵਿਚ ਛੁਰਾ ਮਾਰਿਆ ਸੀ।
ਸਰਕਾਰੀ ਪੈਸੇ ਦਾ ਆਦਤਨ ਲੁਟੇਰਾ ਹੈ ਐਨ.ਕੇ ਸ਼ਰਮਾ, ‘ਆਪ’ ਦੀ ਸਰਕਾਰ ਬਣਨ ‘ਤੇ ਲਵਾਂਗੇ ਹਿਸਾਬ- ਸੁਖਪਾਲ ਸਿੰਘ ਖਹਿਰਾ
ਖਹਿਰਾ ਨੇ ਅੱਗੇ ਕਿਹਾ ਕਿ ਮਲੋਟ ਦੇ ਜਿਸ ਅਕਾਲੀ ਕੌਂਸਲਰ ਸ਼ਾਮ ਲਾਲ ਗੁਪਤਾ (ਡੱਡੀ) ਵਲੋਂ ਸ਼ਰੇਆਮ ਬੋਲੀ ਲਗਾ ਕੇ ਸਰਕਾਰੀ ਨੌਕਰੀਆਂ ਵੇਚੀਆਂ ਗਈਆਂ, ਉਸ ਉਪਰ ਵੀ ਬਾਦਲ ਸਰਕਾਰ ਦੀ ਸਿੱਧੀ ਕ੍ਰਿਪਾ ਰਹੀ ਹੈ। ਇਸੇ ਤਰ੍ਹਾਂ ਫਰੀਦਕੋਟ ਦੇ ਸ਼ਰਾਬ ਦੇ ਵਪਾਰੀ ਅਤੇ ਅਕਾਲੀ ਐਮ.ਐਲ.ਏ ਦੀਪ ਮਲਹੋਤਰਾ ਦੇ ਪੁੱਤਰ ਉਪਰ ਨਜਾਇਜ ਸ਼ਰਾਬ ਰੱਖਣ ਦੇ ਦੋਸ਼ ਸਾਬਿਤ ਹੋਏ ਹਨ ਅਤੇ ਉਸਨੂੰ 1 ਲੱਖ ਰੁਪਏ ਦਾ ਜੁਰਮਾਨਾ ਲੱਗਿਆ ਹੈ। ਖਹਿਰਾ ਨੇ ਕਿਹਾ ਕਿ ਸਭ ਨੂੰ ਪਤਾ ਹੈ ਕਿ ਦੀਪ ਮਲਹੋਤਰਾ ਦੇ ਸਿਰ ਉੱਤੇ ਸਿੱਧਾ ਸੁਖਬੀਰ ਬਾਦਲ ਦਾ ਹੱਥ ਹੈ।
