ਮੈਲਬਰਨ: ਉੱਤਰੀ ਮੈਲਬਰਨ ਦੀ ਬੈਟਮੈਨ ਸੀਟ ਤੋਂ ਗਰੀਨਜ਼ ਪਾਰਟੀ ਦੀ ਉਮੀਦਵਾਰ ਸਿੱਖ ਪਿਛੋਕੜ ਨਾਲ ਸੰਬੰਧਿਤ ਬੀਬੀ ਐਲੈਕਸ ਭੱਠਲ ਖ਼ਿਲਾਫ਼ ਨਸਲੀ ਟਿੱਪਣੀਆਂ ਦਾ ਮਾਮਲਾ ਸਾਹਮਣੇ ਆਇਆ ਹੈ ਹਲਕੇ ‘ਚ ਪਿਛਲੇ ਦਿਨਾਂ ਤੋਂ ਪਰਚੇ ਵੰਡੇ ਗਏ ਹਨ ਜਿਨ੍ਹਾਂ ਉੱਤੇ ਐਲੈਕਸ ਭੱਠਲ ਦੇ ਪਿਛੋਕੜ ਅਤੇ ਧਾਰਮਿਕ ਅਕੀਦਿਆਂ ਵਿਰੁੱਧ ਭੱਦੀ ਸ਼ਬਦਾਵਲੀ ਲਿਖੀ ਗਈ ਹੈ ਬੀਬੀ ਭੱਠਲ ਮੁਤਾਬਿਕ ਇਸ ਘਟਨਾ ਨਾਲ ਸਿੱਖ ਭਾਈਚਾਰੇ ਦੀ ਬਹੁਗਿਣਤੀ ਅਤੇ ਉਨ੍ਹਾਂ ਨੂੰ ਨਿੱਜੀ ਤੌਰ ਉੱਤੇ ਗਹਿਰਾ ਧੱਕਾ ਲੱਗਿਆ ਹੈ ਇਸ ਨੂੰ ਨਸਲੀ ਅਤੇ ਨਫ਼ਰਤ ਭਰਪੂਰ ਪ੍ਰਾਪੇਗੰਡਾ ਦੱਸਦਿਆਂ ਬੀਬੀ ਭੱਠਲ ਨੇ ਕਿਹਾ ਹੈ ਓਨ੍ਹਾਂ ਦਾ ਧਰਮ ਸਰਬੱਤ ਦੇ ਭਲੇ ਦਾ ਸੁਨੇਹਾ ਦਿੰਦਾ ਹੈ ਸਿੱਖ ਸਭ ਨੂੰ ਬਰਾਬਰ ਰੱਖ ਕੇ ਮਨੁੱਖਤਾ ਦੀ ਬਿਹਤਰੀ ਲਈ ਹਮੇਸ਼ਾ ਕਾਰਜਸ਼ੀਲ ਰਹਿੰਦੇ ਹਨ।
ਇਹ ਕਾਰਵਾਈਆਂ ਉਨ੍ਹਾਂ ਨੂੰ ਅਕੀਦੇ ਤੋਂ ਨਹੀਂ ਹਿਲਾ ਸਕਦੀਆਂ ਸਗੋਂ ਓਹ ਹੋਰ ਵੱਧ ਚੜ੍ਹ ਕੇ ਪਾਰਟੀ ਦੇ ਟੀਚਿਆਂ ‘ਤੇ ਕੰਮ ਕਰਨਗੇ ਅਜਿਹੇ ਅਨਸਰਾਂ ਨੂੰ ਸੁਚੇਤ ਕਰਦਿਆਂ ਬੀਬੀ ਭੱਠਲ ਨੇ ਕਿਹਾ ਹੈ ਕਿ ਆਸਟਰੇਲੀਆ ‘ਚ ਨਫ਼ਰਤੀ ਸੋਚ ਅਤੇ ਨਸਲੀ ਪਹੁੰਚ ਲਈ ਕੋਈ ਥਾਂ ਨਹੀਂ। ਉਨ੍ਹਾਂ ਇਸ ਮਾਮਲੇ ਨੂੰ ਲੈ ਕੌਮੀ ਮਨੁੱਖੀ ਅਧਿਕਾਰ ਕਮਿਸ਼ਨ ਕੋਲ ਸ਼ਿਕਾਇਤ ਵੀ ਦਰਜ ਕਰਵਾਈ ਹੈ।
ਦੋ ਜੁਲਾਈ ਨੂੰ ਪੈ ਰਹੀਆਂ ਵੋਟਾਂ ‘ਚ ਲੇਬਰ ਪਾਰਟੀ ਦੀ ਰਵਾਇਤੀ ਸੀਟ ‘ਚ ਹੋਰ ਉਮੀਦਵਾਰਾਂ ਨੂੰ ਸਖ਼ਤ ਮੁਕਾਬਲਾ ਦੇ ਰਹੀ ਐਲਕਸ ਭੱਠਲ ਦੇ ਸਮਰਥਕਾਂ ਨੇ ਸੋਸ਼ਲ ਮੀਡੀਏ ਅਤੇ ਜਨਤਕ ਮੰਚਾਂ ਰਾਹੀਂ ਇਨ੍ਹਾਂ ਕੋਝੀਆਂ ਹਰਕਤਾਂ ਨੂੰ ਵਿਰੋਧੀਆਂ ਦੀ ਹੇਠਲੇ ਪੱਧਰ ਦੀ ਕਾਰਵਾਈ ਕਿਹਾ ਹੈ ਜਿਸ ਨਾਲ ਜ਼ਾਹਿਰ ਹੈ ਕਿ ਇਸ ਉਮੀਦਵਾਰ ਦੀ ਮਕਬੂਲ ਲੋਕ ਪੱਖੀ ਪਹੁੰਚ ਦੂਜੀਆਂ ਪਾਰਟੀਆਂ ਨੂੰ ਹਜ਼ਮ ਨਹੀਂ ਹੋ ਰਹੀ।
