ਬੀਤੀ ਕੜੀ ਦੀ ਗੱਲਬਾਤ ਬਾਰੇ ਪਾਠਕਾਂ ਵਲੋਂ ਇਕ ਇਹ ਪ੍ਰਭਾਵ ਬਣਿਆ ਸੀ ਕਿ ਸ੍ਰ. ਅਜਮੇਰ ਸਿੰਘ ਵਲੋਂ ਉਠਾਏ ਨੁਕਤੇ ਤਾਂ ਸਹੀ ਹਨ ਪਰ ਸ਼ਾਇਦ ਇਹ ਗੱਲ ਇੰਨੀ ਜ਼ਿਆਦਾ ਸਿਧਾਂਤਕ ਤੇ ਆਦਰਸ਼ਕ ਹੈ ਕਿ ਇਸ ਨੂੰ ਅਮਲ ਵਿਚ ਨਹੀਂ ਢਾਲਿਆ ਜਾ ਸਕਦਾ। ਗੱਲ ਬਾਤ ਦੀ ਦੂਜੀ ਕੜੀ ਦੀ ਸ਼ੁਰੂਆਤ ਕਰਦਿਆਂ ਸਿੱਖ ਸਿਆਸਤ ਨਿਊਜ਼ ਦੇ ਸੰਪਾਦਕ ਪਰਮਜੀਤ ਸਿੰਘ ਗਾਜ਼ੀ ਨੇ ਸ੍ਰ. ਅਜਮੇਰ ਸਿੰਘ ਨੂੰ ਜਦੋਂ ਇਸ ਬਾਰੇ ਪੁੱਛਿਆ ਕਿ ਕਿਸੇ ਵੀ ਸਿਧਾਂਤ ਨੂੰ ਇੰਨ-ਬਿੰਨ ਤਾਂ ਵਿਹਾਰ ਵਿਚ ਨਹੀਂ ਲਿਆਂਦਾ ਜਾ ਸਕਦਾ ਤਾਂ ਉਨ੍ਹਾਂ ਕਿਹਾ ਕਿ ਇੰਨ ਬਿੰਨ ਨਾ ਸਹੀਂ ਪਰ ਬਹੁਤ ਕੁਝ ਅਮਲ ਵਿਚ ਲਿਆਦਾ ਜਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਸਿੱਖ ਇਤਿਹਾਸ ਵਿਚ ਹੀ ਇਹ ਗੱਲਾਂ ਵਾਪਰੀਆਂ ਹਨ। ਉਨਹਾਂ ਕਿਹਾ ਕਿ ਜੋ ਗੱਲਾਂ ਅੱਜ ਸਾਨੂੰ ਅਣਹੋਣੀਆਂ ਲੱਗਦੀਆਂ ਹਨ, ਕੋਈ ਮੌਕਾ ਅਜਿਹਾ ਵੀ ਸੀ ਕਿ ਜਦੋਂ ਇਸਦੇ ਉਲਟ ਇਹ ਗੱਲ ਅਣਹੋਣੀ ਲੱਗਦੀ ਹੁੰਦੀ ਸੀ ਕਿ ਕੋਈ ਵਿਅਕਤੀ (ਸਿੱਖ ਆਗੂ) ਲਾਲਚ ਗ੍ਰਸਤ ਹੋ ਜਾਵੇ ਜਾਂ ਨਿੱਜੀ ਸਵਾਰਥ ਜਾਂ ਸ਼ੌਹਰਤ ਪਿੱਛੇ ਪੈ ਜਾਵੇ।
