ਬੰਗਲੁਰੂ: ਕਰਨਾਟਕਾ ਸਰਕਾਰ ਆਪਣੇ ਲਈ ਵੱਖਰਾ ਝੰਡਾ ਅਤੇ ਵੱਖਰਾ ਨਿਸ਼ਾਨ ਬਣਾਉਣ ਲਈ ਸਰਗਰਮ ਹੋ ਗਈ ਹੈ। ਸਰਕਾਰ ਨੇ 9 ਮੈਂਬਰੀ ਇਕ ਕਮੇਟੀ ਬਣਾਈ ਹੈ, ਜਿਸਨੂੰ ਝੰਡੇ ਦਾ ਡਿਜ਼ਾਇਨ ਕਰਨ ਅਤੇ ਨਿਸ਼ਾਨ ਤੈਅ ਕਰਨ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਕਮੇਟੀ ਆਪਣੀ ਰਿਪੋਰਟ ਜਦੋਂ ਸੌਂਪੇਗੀ ਉਸਤੋਂ ਬਾਅਦ ਇਸ ਨੂੰ ਕਾਨੂੰਨੀ ਮਾਨਤਾ ਦਿਵਾਉਣ ਦਾ ਕੰਮ ਸ਼ੁਰੂ ਹੋਏਗਾ।
ਜੇ ਇਹ ਫੈਸਲਾ ਲਾਗੂ ਹੁੰਦਾ ਹੈ ਤਾਂ ਜੰਮੂ ਕਸ਼ਮੀਰ ਤੋਂ ਬਾਅਦ ਇਹ ਦੂਜਾ ‘ਸੂਬਾ’ ਹੋਏਗਾ ਜਿਸਦਾ ਆਪਣਾ ਝੰਡਾ ਅਤੇ ਆਪਣਾ ਨਿਸ਼ਾਨ ਹੋਏਗਾ। ਸਰਕਾਰ ਵਲੋਂ ਇਹ ਕਦਮ ਉਸ ਵੇਲੇ ਚੁੱਕਿਆ ਗਿਆ ਜਦੋਂ ਕੁਝ ਹੀ ਮਹੀਨਿਆਂ ਬਾਅਦ ਕਰਨਾਟਕਾ ‘ਚ ਵਿਧਾਨ ਸਭਾ ਚੋਣਾਂ ਹੋਣ ਵਾਲੀਆਂ ਹਨ। ਕੇਂਦਰੀ ਮੰਤਰੀ ਸਦਾਨੰਦ ਗੌੜਾ ਨੇ ਇਸਤੇ ਇਤਰਾਜ਼ ਕੀਤਾ ਹੈ।
ਕਰਨਾਟਕਾ ‘ਚ ਸਿਧਾਰਮੱਈਆ ਸਰਕਾਰ ਵਲੋਂ ਇਹ ਕਦਮ ਪਹਿਲੀ ਵਾਰ ਨਹੀਂ ਚੁੱਕਿਆ ਗਿਆ, ਸਗੋਂ ਪਹਿਲਾਂ ਵੀ ਕਰਨਾਟਕਾ ‘ਚ ਵੱਖਰੇ ਝੰਡੇ ਦੀ ਮੰਗ ਉਠਦੀ ਰਹੀ ਹੈ ਪਰ ਇਸਨੂੰ ਮਨਵਾਇਆ ਨਹੀਂ ਜਾ ਸਕਿਆ ਸੀ।
