ਚੰਡੀਗੜ੍ਹ (10 ਮਾਰਚ, 2015): ਭਾਈ ਜਗਤਾਰ ਸਿੰਘ ਤਾਰਾ ਦਾ ਦੋ ਪੁਲਿਸ ਰਿਮਾਂਡ ਲੈਣ ਲਈ ਚੰਡੀਗੜ੍ਹ ਪੁਲਿਸ ਨੇ ਹੁਣ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਵਿੱਚ ਪਹੁੰਚ ਕੀਤੀ ਹੈ। ਇਸਤੋਂ ਪਹਿਲਾਂ ਦੋ ਵਾਰ ਹੇਠਲੀ ਅਦਾਲਤ ਅਤੇ ਜਿਲਾ ਅਤੇ ਵਧੀਕ ਸ਼ੈਸ਼ਨ ਜੱਜ ਦੀ ਅਦਾਲਤ ਭਾਈ ਤਾਰਾ ਦੇ ਪੁਲਿਸ ਰਿਮਾਂਡ ਲਈ ਚੰਡੀਗੜ੍ਹ ਪੁਲਿਸ ਦੀ ਅਰਜ਼ੀ ਰੱਦ ਕਰ ਚੁੱਕੀ ਹੈ।
ਪੁਲਿਸ ਨੇ ਜ਼ਿਲਾ ਅਦਾਲਤ ਕੋਲੋਂ ਤਾਰੇ ਦਾ 14 ਦਿਨਾਂ ਦਾ ਰਿਮਾਂਡ ਮੰਗਿਆ ਗਿਆ ਸੀ, ਪਰ ਅਦਾਲਤ ਨੇ ਉਸ ਨੂੰ ਇਸ ਕੇਸ ‘ਚੋਂ ਜ਼ਮਾਨਤ ਦਿੰਦਿਆਂ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ ਲਈ ਬੁੜੈਲ ਜੇਲ੍ਹ ਭੇਜ ਦਿੱਤਾ ਗਿਆ ਸੀ।
ਭਾਈ ਤਾਰੇ ਦੇ ਵਕੀਲਾਂ ਦਾ ਤਰਕ ਹੈ ਕਿ ਜੇਲ੍ਹ ਬਰੇਕ ਕੇਸ ਵਿਚਲੀਆਂ ਗ਼ੈਰ-ਜ਼ਮਾਨਤੀ ਧਾਰਾਵਾਂ ਪਹਿਲਾਂ ਹੀ ਉਪਰਲੀ ਅਦਾਲਤ ਖਤਮ ਕਰ ਚੁੱਕੀਆਂ ਹਨ ਅਤੇ ਬਾਕੀ ਬਚਦੀ ਇਕ ਧਾਰਾ 224 ਜ਼ਮਾਨਤਯੋਗ ਹੈ।ਦੂਸਰੇ ਪਾਸੇ ਪੁਲੀਸ ਦੇ ਵਕੀਲ ਨੇ ਕਿਹਾ ਕਿ ਜੇਲ੍ਹ ਵਿੱਚੋਂ ਫਰਾਰ ਹੋਣ ਤੋਂ ਬਾਅਦ ਭਾਈ ਤਾਰਾ ਪਹਿਲੀ ਵਾਰ 17 ਫਰਵਰੀ 2015 ਨੂੰ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਹੋਇਆ ਤੇ ਉਸ ਉਪਰ ਪਹਿਲੀਆਂ ਧਰਾਵਾਂ ਬਰਕਰਾਰ ਹਨ ।
ਉਸ ਦਿਨ ਬਹਿਸ ਮਗਰੋਂ ਅਦਾਲਤ ਨੇ ਜੇਲ੍ਹ ਬਰੇਕ ਕੇਸ ਵਿੱਚੋਂ ਭਾਈ ਤਾਰੇ ਨੂੰ ਜ਼ਮਾਨਤ ਦੇ ਦਿੱਤੀ ਅਤੇ ਇਸ ਸਬੰਧ ਵਿੱਚ ਇਕ ਲੱਖ ਰੁਪਏ ਦੇ ਬੌਾਡ ਨਾ ਭਰਨ ਕਾਰਨ ਉਸ ਨੂੰ ਬੁੜੈਲ ਜੇਲ੍ਹ ਵਿੱਚ ਭੇਜ ਦਿੱਤਾ ਗਿਆ, ਪਰ ਚੰਡੀਗੜ੍ਹ ਪੁਲਿਸ ਉਸਦਾ ਤੋਂ ਹਿਰਾਸਤੀ ਪੁਛਗਿਛ ਦੀ ਗੱਲ ‘ਤੇ ਅੜੀ ਹੋਈ ਹੈ ।ਜਾਣਕਾਰੀ ਮੁਤਾਬਿਕ ਪੁਲੀਸ ਭਾਈ ਤਾਰੇ ਕੋਲੋਂ ਉਨ੍ਹਾਂ ਨਾਲ ਫਰਾਰ ਹੋਏ ਰਸੋਈਏ ਦੇਵੀ ਸਿੰਘ ਦਾ ਥਹੁ-ਪਤਾ ਲੈਣ ਦੀ ਵੀ ਤਾਕ ‘ਚ ਹੈ। ਅੱਜ ਹਾਈਕੋਰਟ ਵਿਚ ਜਸਟਿਸ ਪਰਮਜੀਤ ਸਿੰਘ ਵਲੋਂ ਇਸ ਕੇਸ ਦੀ ਸੁਣਵਾਈ ਆਉਂਦੀ 18 ਮਾਰਚ ‘ਤੇ ਪਾ ਦਿੱਤੀ ਗਈ ।
