ਚੰਡੀਗੜ੍ਹ (6 ਜਨਵਰੀ, 2015): ਪੰਜਾਬ ਦੇ ਪੁਲਿਸ ਮੁਖੀ ਸੁਮੇਧ ਸੈਣੀ (ਘਟਨਾ ਵੇਲੇ ਐੱਸ. ਐੱਸ. ਪੀ. ਲੁਧਿਆਣਾ) ਇਸ ਮਾਮਲੇ ਵਿਚ ਅਗਵਾ ਅਤੇ ਹੱਤਿਆ ਜਿਹੇ ਸੰਗੀਨ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਹਨ ।
ਵਿਸ਼ੇਸ਼ ਜੱਜ ਜਸਟਿਸ ਅਨੂਪ ਕੁਮਾਰ ਮਹਿੰਦੀਰੱਤਾ ਦੀ ਅਗਵਾਈ ਵਾਲੀ ਸੀ.ਬੀ.ਆਈ. ਵਿਸ਼ੇਸ਼ ਅਦਾਲਤ ਦਿੱਲੀ ਵੱਲੋਂ ਬੀਤੀ 17 ਦਸੰਬਰ ਨੂੰ ਕੇਸ ਦੇ ਪ੍ਰਮੁੱਖ ਗਵਾਹ ਨੰਬਰ-3 ਆਸ਼ਿਸ਼ ਕੁਮਾਰ ਆਹਲੂਵਾਲੀਆ ਕੋਲੋਂ ਸੈਣੀ ਦੇ ਵਕੀਲਾਂ ਦੁਆਰਾ ਦੁਵੱਲੀ ਪੁੱਛਗਿੱਛ ਕੀਤੇ ਜਾਣ ‘ਤੇ ਹੀ ਲਗਾਤਾਰ ਮਹੀਨਿਆਂ ਬੱਧੀ ਦੇਰੀ ਹੁੰਦੀ ਆ ਰਹੀ ਹੋਣ ਦਾ ਸਖ਼ਤ ਨੋਟਿਸ ਲੈਂਦਿਆਂ ਮਾਮਲਾ 7 ਜਨਵਰੀ ਤੋਂ ਲਗਾਤਾਰ ਸੁਣਵਾਈ ਹਿਤ ਤੈਅ ਕਰਨ ਦੇ ਨਿਰਦੇਸ਼ ਜਾਰੀ ਕਰ ਦਿੱਤੇ ਗਏ ।
ਸੀ. ਬੀ. ਆਈ. ਵਿਸ਼ੇਸ਼ ਅਦਾਲਤ ਦਿੱਲੀ ਵੱਲੋਂ ਕਰੀਬ ਦੋ ਦਹਾਕਿਆਂ ਤੋਂ ਅਦਾਲਤੀ ਅਤੇ ਜਾਂਚ ਏਜੰਸੀ ਦੀਆਂ ਘੁੰਮਣ ਘੇਰੀਆਂ ਵਿਚ ਫਸੇ ਹੋਏ ਸਾਲ 1994 ਦੇ ਲੁਧਿਆਣਾ ਅਗਵਾ ਅਤੇ ਹੱਤਿਆ ਕੇਸ ਦੇ ਤੇਜੀ ਨਾਲ ਨਿਪਟਾਰੇ ਦਾ ਤਹੱਈਆ ਕਰ ਲਿਆ ਗਿਆ ਜਾਪਦਾ ਹੈ ।
ਵਿਸ਼ੇਸ਼ ਜੱਜ ਵੱਲੋਂ ਗਵਾਹ ਨੰਬਰ-3 ਤੋਂ ਜਿਰਾਹ ਮੁਕੰਮਲ ਹੋਣ ਤਾਈ ਰੋਜ਼ਾਨਾ ਕੇਸ ਸੁਣਿਆ ਜਾਣ ਦੇ ਲਿਖਤੀ ਆਦੇਸ਼ ਜਾਰੀ ਕੀਤੇ ਗਏ ਹਨ । ਇਸ ਕੇਸ ਵਿਚ ਸ੍ਰੀ ਸੈਣੀ ਵੱਲੋਂ ਸੀਨੀਅਰ ਐਡਵੋਕੇਟ ਕੇ.ਕੇ. ਸੂਦ ਪੇਸ਼ ਹੋ ਰਹੇ ਹਨ ।
ਸੁਮੇਧ ਸੈਣੀ ਵੱਲੋਂ ਸੀ. ਬੀ. ਆਈ. ਵਿਸ਼ੇਸ਼ ਅਦਾਲਤ ਵਿਚ ਪੇਸ਼ ਹੋ ਰਹੇ ਸੀਨੀਅਰ ਐਡਵੋਕੇਟ ਕੇ.ਕੇ. ਸੂਦ ਨੇ ਅੱਜ ‘ਅਜੀਤ’ ਨਾਲ ਗੱਲ ਕਰਦਿਆਂ ਇਸ ਲਗਾਤਾਰ ਸੁਣਵਾਈ ਦੌਰਾਨ ਵੀ ਅਦਾਲਤ ਖ਼ਾਸਕਰ ਜੱਜ ਸਾਹਿਬ ਵੱਲੋਂ ਕਿਆਸੇ ਗਏ ਸਹਿਯੋਗ ‘ਤੇ ਪੂਰਾ ਉੱਤਰਨ ਦੀ ਕੋਸ਼ਿਸ਼ ਕਰਨ ਦੀ ਗੱਲ ਕਹੀ ।
ਜ਼ਿਕਰਯੋਗ ਹੈ ਕਿ ਇਹ ਕੇਸ ਆਸ਼ਿਸ਼ ਦੇ ਭਰਾ ਵਿਨੋਦ ਕੁਮਾਰ, ਜੀਜਾ ਅਸ਼ੋਕ ਕੁਮਾਰ ਅਤੇ ਡਰਾਈਵਰ ਮੁਖ਼ਤਿਆਰ ਸਿੰਘ ਦੀ 1994 ਵਿਚ ਲੁਧਿਆਣਾ ਤੋਂ ਹੋਈ ਗੁੰਮਸ਼ੁਦਗੀ ਨਾਲ ਸਬੰਧਿਤ ਹੈ ਙ ਇਨ੍ਹਾਂ ਵਿਅਕਤੀਆਂ ਦਾ ਮਾਰਚ 1994 ਤੋਂ ਬਾਅਦ ਕੋਈ ਥਹੁ ਪਤਾ ਨਹੀਂ ਲੱਗਾ ।
ਸੁਮੇਧ ਸਿੰਘ ਸੈਣੀ ‘ਤੇ ਇਸ ਕਾਰਵਾਈ ਨੂੰ ਲੈ ਕੇ ਭਾਰਤੀ ਦੰਡਾਵਲੀ ਦੀ ਧਾਰਾ 364 ਦੇ ਅਧੀਨ ਦੋਸ਼ ਲੱਗੇ ਹੋਏ ਹਨ, ਜਿਸ ਬਾਰੇ ਕਿ ਸੀ.ਬੀ.ਆਈ. ਦੀ ਚਾਰਜਸ਼ੀਟ ਵਿਚ ਲੁਧਿਆਣਾ ਦੇ ਤਤਕਾਲੀ ਐਸ.ਐਸ.ਪੀ. ਸ੍ਰੀ ਸੈਣੀ ਅਤੇ 3 ਹੋਰ ਪੁਲਿਸ ਅਧਿਕਾਰੀਆਂ ਉੱਤੇ ਇਨ੍ਹਾਂ ਨੂੰ ਅਗਵਾ ਕਰਨ ਅਤੇ ਫਿਰ ਖੁਰਾ-ਖੋਜ ਮਿਟਾ ਦੇਣ ਦੇ ਦੋਸ਼ਾਂ ਤਹਿਤ ਕਰੀਬ ਦੋ ਦਹਾਕਿਆਂ ਤੋਂ ਹੀ ਇਹ ਕੇਸ ਚੱਲ ਰਿਹਾ ਹੈ ।
ਇਸਤੋਂ ਇਲਾਵਾ ਵੀ ਪੰਜਾਬ ਪੁਲਿਸ ਦੇ ਮੁਖੀ ਸੁਮੇਧ ਸੈਣੀ ‘ਤੇ ਪੰਜਾਬ ਵਿੱਚ ਖਾੜਕੂਵਾਦ ਦੌਰਾਨ ਮਨੁੱਖੀ ਅਧਿਕਾਰਾਂ ਨੂੰ ਕੁਚਲਣ ਦੇ ਅਨੇਕਾਂ ਦੋਸ਼ ਲੱਗੇ ਸਨ।
