ਸ੍ਰੀਨਗਰ: ਭਾਰਤ ਦੇ ਕਬਜ਼ੇ ਵਾਲੇ ਕਸ਼ਮੀਰ ‘ਚ ਪੈਲੇਟ ਗੰਨ ਦੇ ਫਾਇਰ ਨਾਲ ਜ਼ਖਮੀ ਹੋਏ 12 ਸਾਲਾਂ ਦੇ ਬੱਚੇ ਦੀ ਮੌਤ ਹੋ ਗਈ। ਇਸਤੋਂ ਬਾਅਦ ਘਾਟੀ ‘ਚ ਇਕ ਵਾਰ ਫੇਰ ਭਾਰਤੀ ਪੁਲਿਸ ਅਤੇ ਕਸ਼ਮੀਰੀਆਂ ‘ਚ ਹਿੰਸਕ ਝੜਪਾਂ ਸ਼ੁਰੂ ਹੋ ਗਈਆਂ।
ਸ੍ਰੀਨਗਰ ਦੇ ਸੈਦਪੋਰਾ ਦਾ ਰਹਿਣ ਵਾਲਾ 6ਵੀਂ ਜਮਾਤ ਦਾ ਵਿਿਦਆਰਥੀ 12 ਸਾਲਾ ਜੁਨੈਦ ਅਹਿਮਦ ਭੱਟ ਆਪਣੇ ਘਰ ਦੇ ਬਾਹਰ ਖੜ੍ਹਾ ਸੀ, ਉਸੇ ਵੇਲੇ ਪੈਲੇਟ ਲਗਣ ਨਾਲ ਗੰਭੀਰ ਜ਼ਖਮੀ ਹੋ ਗਿਆ।
ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਲੋਕਾਂ ਦੇ ਰੋਸ ਪ੍ਰਦਰਸ਼ਨਾਂ ਨੂੰ ਰੋਕਣ ਲਈ ਪੁਲਿਸ ਨੂੰ ਪੈਲੇਟ ਗੰਨ ਦਾ ਇਸਤੇਮਾਲ ਕਰਨਾ ਪਿਆ। ਪੁਲਿਸ ਨੇ ਇਹ ਵੀ ਮੰਨਿਆ ਕਿ ਜੁਨੈਦ ਉਸ ਪ੍ਰਦਰਸ਼ ਦਾ ਹਿੱਸਾ ਨਹੀਂ ਸੀ। ਇਕ ਅਧਿਕਾਰੀ ਨੇ ਆਪਣਾ ਨਾਂ ਨਾ ਨਸ਼ਰ ਕਰਨ ਦੀ ਸ਼ਰਤ ‘ਤੇ ਦੱਸਿਆ, ‘ਉਹ ਸ਼ਹਿਰ ਦੇ ਸੈਦਪੋਰਾ ‘ਚ ਆਪਣੇ ਘਰ ਦੇ ਮੁੱਖ ਦਰਵਾਜ਼ੇ ‘ਤੇ ਖੜ੍ਹਾ ਸੀ, ਉਸੇ ਵੇਲੇ ਉਸਦੇ ਕਈ ਛੱਰੇ ਲੱਗੇ।’
ਸਿਰ ਅਤੇ ਛਾਤੀ ‘ਤੇ ਦਰਜਣਾਂ ਛੱਡੇ ਲੱਗਣ ਦੀ ਵਜ੍ਹਾ ਕਰਕੇ ਜੁਨੈਦ ਗੰਭੀਰ ਜ਼ਖਮੀ ਹੋ ਗਿਆ ਸੀ। ਸਥਾਨਕ ਲੋਕਾਂ ਨੇ ਉਸੇ ਵੇਲੇ ਉਸਨੂੰ ਇਲਾਜ ਲਈ ਸ਼ੇਰ-ਏ-ਕਸ਼ਮੀਰ ਇੰਸਟੀਟਿਊਟ ਆਫ ਮੈਡੀਕਲ ਸਾਇੰਸਿਸ (SeKIMS) ਭਰਤੀ ਕਰਾਇਆ ਸੀ, ਜਿਥੇ ਉਸਦੀ ਮੌਤ ਹੋ ਗਈ।
ਜੁਨੈਦ ਦੀ ਲਾਸ਼ ਜਦੋਂ ਘਰ ਲਿਜਾਈ ਜਾ ਰਹੀ ਸੀ ਤਾਂ ਉਸਦੀ ਮੌਤ ਤੋਂ ਨਾਰਾਜ਼ ਸੈਂਕੜੇ ਲੋਕ ਸੜਕਾਂ ‘ਤੇ ਆ ਗਏ ਅਤੇ ਸਰਕਾਰ ਵਿਰੋਧੀ ਨਾਅਰੇ ਲਾਉਣ ਲੱਗੇ। ਜੁਨੈਦ ਦਾ ਮ੍ਰਿਤਕ ਸਰੀਰ ਲੈ ਕੇ ਸ਼ਹਿਰ ‘ਚ ਈਦਗਾਹ ਜਾ ਰਹੇ ਲੋਕਾਂ ‘ਤੇ ਭਾਰਤੀ ਨੀਮ ਫੌਜੀ ਦਸਤਿਆਂ ਨੇ ਅੱਥਰੂ ਗੈਸ ਦੇ ਗੋਲੇ ਛੱਡੇ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਭਾਰਤੀ ਦਸਤਿਆਂ ਨੇ ਮ੍ਰਿਤਕ ਸਰੀਰ ਲਿਜਾ ਰਹੇ ਲੋਕਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ। ਇਸੇ ਗੱਲ ਕਰਕੇ ਪੁਲਿਸ ਵਾਲਿਆਂ ਅਤੇ ਸਥਾਨਕ ਲੋਕਾਂ ‘ਚ ਹਿੰਸਕ ਝੜਪਾਂ ਸ਼ੁਰੂ ਹੋ ਗਈਆਂ। ਇਨ੍ਹਾਂ ਝੜਪਾਂ ਵੇਲੇ ਵੀ ਪੁਲਿਸ ਨੇ ਦੁਬਾਰਾ ਅੱਥਰੂ ਗੈਸ ਦੇ ਗੋਲੇ ਛੱਡੇ ਅਤੇ ਪੈਲੇਟ ਗੰਨ ਦੇ ਫਾਇਰ ਕੀਤੇ। ਜਿਸ ਵਿਚ ਕਈ ਲੋਕ ਗੰਭੀਰ ਫੱਟੜ ਹੋ ਗਏ।
ਜ਼ਿਕਰਯੋਗ ਹੈ ਕਿ 8-9 ਜੁਲਾਈ ਨੂੰ ਹਿਜ਼ਬੁਲ ਕਮਾਂਡਰ ਬੁਰਹਾਨ ਵਾਨੀ ਦੀ ਮੌਤ ਤੋਂ ਬਾਅਦ ਕਸ਼ਮੀਰ ਘਾਟੀ ‘ਚ ਕਰਫਿਊ ਅਤੇ ਪ੍ਰਦਰਸ਼ਨਾਂ ਅਤੇ ਪੈਲੇਟ ਗੰਨ ਦੇ ਫਾਇਰ ਨਾਲ ਅੰਨ੍ਹੇ ਹੋਣ ਅਤੇ ਮੌਤਾਂ ਦਾ ਅਜਿਹਾ ਦੌਰ ਸ਼ੁਰੂ ਹੋਇਆ ਜੋ ਕਿ ਹੁਣ ਤਕਰੀਬਨ 100 ਅਤੇ ਤਕਰੀਬਨ 100 ਮੌਤਾਂ ਹੋਣ ਦੇ ਬਾਵਜੂਦ ਜਾਰੀ ਹੈ।
ਕਸ਼ਮੀਰ ਦੇ ਸਾਰੀਆਂ ਸਿੱਖਿਆ ਸੰਸਥਾਵਾਂ, ਸਰਕਾਰੀ ਬੱਸਾਂ, ਮੁੱਖ ਬਜ਼ਾਰ ਉਦੋਂ ਤੋਂ ਹੀ ਬੰਦ ਹਨ।
ਜੁਨੈਦ ਦੀ ਮੌਤ ਤੋਂ ਬਾਅਦ ਹੁਰੀਅਤ ਨੇ ਬੰਦ ਦਾ ਸੱਦਾ ਹੁਣ 13 ਅਕਤੂਬਰ ਤਕ ਵਧਾ ਦਿੱਤਾ ਹੈ।
