ਚੰਡੀਗੜ੍ਹ (6 ਜੁਲਾਈ, 2015): ਬਲਾਤਕਾਰ ਅਤੇ ਕਤਲਾਂ ਵਰਗੇ ਸੰਗੀਨ ਮਾਮਲਿਆਂ ਦਾ ਸੀਬੀਆਈ ਅਦਲਾਤ ਵਿੱਚ ਸਾਹਮਣਾ ਕਰ ਰਹੇ ਵਿਵਾਦਤ ਡੇਰਾ ਸਿਰਸਾ ਦੇ ਸਾਧ ਗੁਰਮੀਤ ਰਾਮ ਰਹੀਮ ਨੂੰ ਅਦਾਲਤ ਨੇ ਵਾਪਿਸ ਪਰਤ ਆਉਣ ਦੇ ਹੁਕਮ ਦਿਤੇ ਹਨ।
ਪੰਚਕੂਲਾ ਵਿਚ ਸੀ. ਬੀ. ਆਈ. ਦੀ ਵਿਸ਼ੇਸ਼ ਅਦਾਲਤ ਨੇ ਡੇਰਾ ਸਿਰਸਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਨੂੰ 7 ਜੁਲਾਈ ਦੀ ਅੱਧੀ ਰਾਤ ਤਕ ਭਾਰਤ ਵਾਪਸ ਆਉਣ ਦੀ ਹਦਾਇਤ ਕੀਤੀ ਹੈ ਅਤੇ ਉਸ ਦੀ ਵਿਦੇਸ਼ ਵਿਚ ਠਹਿਰਨ ਲਈ ਹੋਰ ਸਮਾਂ ਦੇਣ ਸਬੰਧੀ ਅਰਜ਼ੀ ਖਾਰਜ ਕਰ ਦਿੱਤੀ ਹੈ।
ਆਪਣੀ ਫਿਲਮ ‘ਐਮ ਐਸ ਜੀ 2’ ਦੇ ਪ੍ਰਚਾਰ ਲਈ ਡੇਰਾ ਮੁਖੀ ਇਸ ਸਮੇਂ ਵਿਦੇਸ਼ ਗਿਆ ਹੋਇਆ ਹੈ ਅਤੇ ਉਸ ਨੇ ਅਦਾਲਤ ਵਿਚ ਇਕ ਅਰਜ਼ੀ ਦਾਇਰ ਕਰਕੇ 24 ਜੁਲਾਈ ਤੱਕ ਵਿਦੇਸ਼ ਵਿਚ ਰਹਿਣ ਦੀ ਇਜਾਜ਼ਤ ਮੰਗੀ ਸੀ। ਉਸ ਨੇ ਵਿਦੇਸ਼ ਵਿਚ ਹੋਰ ਸਮਾਂ ਰਹਿਣ ਦੀ ਇਜਾਜ਼ਤ ਇਸ ਆਧਾਰ ‘ਤੇ ਮੰਗੀ ਸੀ ਕਿ ਉਸ ਨੂੰ ਸਮਾਂ ਰਹਿੰਦੇ ਵੀਜ਼ਾ ਨਹੀਂ ਸੀ ਮਿਲਿਆ।
ਉਸ ਦੀ ਅਰਜ਼ੀ ਦਾ ਸੀ. ਬੀ. ਆਈ. ਦੇ ਵਕੀਲ ਐਚ. ਪੀ. ਐਸ. ਵਰਮਾ ਨੇ ਵਿਰੋਧ ਕਰਦਿਆਂ ਕਿਹਾ ਕਿ ਡੇਰਾ ਮੁਖੀ ਖਿਲਾਫ ਜਬਰ-ਜਨਾਹ ਅਤੇ ਕਤਲ ਦੇ ਮਾਮਲੇ ਆਖਰੀ ਪੜਾਅ ‘ਤੇ ਪੁੱਜੇ ਹੋਏ ਹਨ ਅਤੇ ਉਹ ਮਾਮਲੇ ਨੂੰ ਲਟਕਾਉਣ ਲਈ ਚਾਲਾਂ ਖੇਡ ਰਿਹਾ ਹੈ।
ਸ੍ਰੀ ਵਰਮਾ ਨੇ ਕਿਹਾ ਕਿ ਸਬੰਧਿਤ ਦੇਸ਼ਾਂ ਵਲੋਂ ਵੀਜ਼ਾ ਦੇਣ ਦੀ ਪ੍ਰਕਿਰਿਆ ਨਾਲ ਅਦਾਲਤ ਨੇ ਕੁਝ ਵੀ ਲੈਣਾ-ਦੇਣਾ ਨਹੀਂ ਅਤੇ ਮਾਮਲੇ ਦੀ ਸੁਣਵਾਈ ਕਰਦੇ ਸਮੇਂ ਦੋਸ਼ੀ ਦੀਆਂ ਇੱਛਾਵਾਂ ਅਤੇ ਉਸ ਦੀ ਸਹੂਲਤ ਮੁਤਾਬਕ ਕਾਰਵਾਈ ਨਹੀਂ ਕਰਨੀ ਚਾਹੀਦੀ। ਇਸ ਤੋਂ ਪਹਿਲਾਂ ਅਦਾਲਤ ਨੇ ਡੇਰਾ ਮੁਖੀ ਨੂੰ ਆਪਣੀ ਫਿਲਮ ਦੇ ਪ੍ਰਚਾਰ ਲਈ 7 ਜੂਨ ਤੋਂ 3 ਜੁਲਾਈ ਤੱਕ ਵਿਦੇਸ਼ ਜਾਣ ਦੀ ਇਜਾਜ਼ਤ ਦੇ ਦਿੱਤੀ ਸੀ।
