ਨਵੀਂ ਦਿੱਲੀ: ਭਾਰਤ ਦੇ ਕੇਂਦਰੀ ਗ੍ਰਹਿ ਮੰਤਰਾਲੇ ਵੱਲੋਂ ਕਸ਼ਮੀਰ ‘ਚ ਪੈਲੇਟ ਗੰਨ ਦੇ ਇਸਤੇਮਾਲ ‘ਤੇ ਕੌਮਾਂਤੀ ਪੱਧਰ ‘ਤੇ ਹੋਈ ਆਲੋਚਨਾ ਤੋਂ ਬਾਅਦ ਮਾਹਿਰਾਂ ਦੀ ਕਮੇਟੀ ਵੱਲੋਂ ਮਿਰਚਾਂ ਵਾਲੇ ‘ਪਾਵਾ ਗੋਲੇ’ ਨੂੰ ਪੈਲੇਟ ਗੰਨ ਦੇ ਬਦਲ ਵਜੋਂ ਦੇਖਿਆ ਜਾ ਰਿਹਾ ਹੈ। ਮਿਰਚ ਆਧਾਰਿਤ ‘ਪਾਵਾ’ ਦਾ ਪੂਰਾ ਨਾਂਅ ‘ਪੇਲਆਰਗੇਨਿਕ ਐਸਿਡ ਵੈਨਲਿਲ ਏਮਿਦੇ’ ਹੈ ਅਤੇ ਇਸ ਨੂੰ ਨੋਨਿਵਾਮਿਦੇ ਦੇ ਨਾਂਅ ਨਾਲ ਵੀ ਜਾਣਿਆ ਜਾਂਦਾ ਹੈ। ਕਮੇਟੀ ਨੇ ਇਸ ਹਫ਼ਤੇ ਦੇ ਸ਼ੁਰੂ ‘ਚ ਹੀ ਇਨ੍ਹਾਂ ‘ਪਾਵਾ ਗੋਲੇ’ ਦਾ ਦਿੱਲੀ ‘ਚ ਪ੍ਰਦਰਸ਼ਨ ਦੇਖਿਆ।
ਜਿਸ ਤੋਂ ਬਾਅਦ ਕਮੇਟੀ ਨੇ ਜੰਮੂ-ਕਸ਼ਮੀਰ ‘ਚ ਭਾਰਤੀ ਫੌਜੀ ਅਤੇ ਨੀਮ ਫੌਜੀ ਦਸਤਿਆਂ ਵੱਲੋਂ ਰੋਸ ਪ੍ਰਦਰਸ਼ਨਾਂ ਦੀ ਸਥਿਤੀ ‘ਚ ਭੀੜ ‘ਤੇ ਕਾਬੂ ਪਾਉਣ ਲਈ ਵਰਤੀਆਂ ਜਾਂਦੀਆਂ ਪੈਲੇਟ ਗੰਨ ਦੀ ਥਾਂ ‘ਤੇ ‘ਪਾਵਾ ਗੋਲੇ’ ਦੀ ਵਰਤੋਂ ਸਬੰਧੀ ਹਾਮੀ ਭਰ ਦਿੱਤੀ ਕਿਉਂਕਿ ਪੈਲੇਟ ਗੰਨ ਦੀ ਵਰਤੋ ਨਾਲ ਕਈ ਲੋਕਾਂ ਦੀਆਂ ਅੱਖਾਂ ਦੀ ਰੌਸ਼ਨੀ ਚਲੀ ਜਾਣ ਅਤੇ ਕਈਆਂ ਦੇ ਜ਼ਖ਼ਮੀ ਹੋ ਜਾਣ ਕਾਰਨ ਪੈਲੇਟ ਗੰਨ ਦੀ ਵਰਤੋਂ ਸਬੰਧੀ ਚੁਫੇਰਿਓਂ ਆਲੋਚਨਾ ਕੀਤੀ ਜਾ ਰਹੀ ਹੈ। ਕਮੇਟੀ ਦੇ ਸੂਤਰਾਂ ਅਨੁਸਾਰ ਕਮੇਟੀ ਮੈਂਬਰ ਪੈਲੇਟ ਗੰਨ ਦੇ ਬਦਲ ਵਜੋਂ ‘ਪਾਵਾ ਗੋਲੇ’ ਦੇ ਹੱਕ ‘ਚ ਹਨ। ਕਮੇਟੀ ਅਨੁਸਾਰ ‘ਪਾਵਾ ਗੋਲੇ’ ਨੂੰ ਘੱਟ ਘਾਤਕ ਹਥਿਆਰ ਦੀ ਸ਼੍ਰੇਣੀ ‘ਚ ਰੱਖਿਆ ਜਾ ਸਕਦਾ ਹੈ। ਦਾਗੇ ਜਾਣ ਪਿੱਛੋਂ ਜਦੋਂ ਗੋਲਾ ਫਟਦਾ ਹੈ ਅਤੇ ਨਿਸ਼ਾਨੇ (ਪ੍ਰਦਰਸ਼ਨਕਾਰੀਆਂ) ਨੂੰ ਅਸਥਾਈ ਰੂਪ ਨਾਲ ਸੁੰਨ ਅਤੇ ਲਕਵਾਗ੍ਰਸਤ ਬਣਾ ਦਿੰਦਾ ਹੈ। ਅੱਥਰੂ ਗੈਸ ਅਤੇ ਮਿਰਚ ਵਾਲੀ ਸਪਰੇਅ ਦੇ ਮੁਕਾਬਲੇ ਇਸ ਦਾ ਪ੍ਰਭਾਵ ਤੇਜ਼ੀ ਨਾਲ ਘੱਟ ਹੁੰਦਾ ਹੈ।
