ਰੋਮ, ਨਵੀਂ ਦਿੱਲੀ (28 ਮਈ, 2015): ਸੰਯੁਕਤ ਰਾਸ਼ਟਰ ਦੀ ਸਾਲਾਨਾ ਰਿਪੋਰਟ ਅਨੁਸਾਰ ਭਾਰਤ ਭੁੱਖਮਰੀ ਦਾ ਸ਼ਿਕਾਰ ਲੋਕਾਂ ਦਾ ਦੁਨੀਆ ‘ਚ ਸਭ ਤੋਂ ਵੱਡਾ ਘਰ ਹੈ। ਰਿਪੋਰਟ ਅਨੁਸਾਰ ਭਾਰਤ ‘ਚ 19.46 ਕਰੋੜ ਲੋਕ ਭੁੱਖੇ ਸੌਾਦੇ ਹਨ। ਇਹ ਗਿਣਤੀ ਚੀਨ ‘ਚ ਭੁੱਖਮਰੀ ਦਾ ਸ਼ਿਕਾਰ ਲੋਕਾਂ ਤੋਂ ਜ਼ਿਆਦਾ ਹੈ। ਇਸ ਮਾਮਲੇ ‘ਚ ਚੀਨ ਦੂਜੇ ਨੰਬਰ ‘ਤੇ ਹੈ।
ਪੰਜਾਬੀ ਅਖਬਾਰ ਅਜ਼ੀਤ ਵਿੱਚ ਛਪੀ ਰਿਪੋਰਟ ਅਨੁਸਾਰ ਸੰਯੁਕਤ ਰਾਸ਼ਟਰ ਦੀ ਖੁਰਾਕ ਤੇ ਖੇਤੀ ਸੰਗਠਨ (ਐਫ ਏ ਓ) ਨੇ ‘ਵਿਸ਼ਵ ਖੁਰਾਕ ਅਸੁਰੱਖਿਅਤ ਸਥਿਤੀ 2015’ ਸਿਰਲੇਖ ਵਾਲੀ ਰਿਪੋਰਟ ‘ਚ ਕਿਹਾ ਕਿ ਵਿਸ਼ਵ ਭਰ ‘ਚ ਭੁੱਖ ਤੋਂ ਪੀੜਤਾਂ ਦੀ ਗਿਣਤੀ 79.5 ਕਰੋੜ ਤੱਕ ਘੱਟ ਗਈ ਹੈ ਜੋ 1990 ਤੋਂ 1992 ਦੌਰਾਨ 100 ਕਰੋੜ ਦੇ ਕਰੀਬ ਸੀ।
ਇਸ ਸੂਚੀ ‘ਚ ਸਭ ਤੋਂ ਜ਼ਿਆਦਾ ਪ੍ਰਗਤੀ ਚੀਨ ਨੇ ਕੀਤੀ। ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਭਾਰਤ ‘ਚ ਵੀ 1990 ਦੇ ਮੁਕਾਬਲੇ 2015 ‘ਚ ਭੁੱਖਮਰੀ ਦਾ ਸ਼ਿਕਾਰ ਲੋਕਾਂ ਦੀ ਗਿਣਤੀ ‘ਚ ਕਮੀ ਦੇਖੀ ਗਈ ਹੈ।
ਭਾਰਤ ‘ਚ 1990-92 ‘ਚ ਭੁੱਖਮਰੀ ਦੇ ਸ਼ਿਕਾਰ ਲੋਕਾਂ ਦੀ ਗਿਣਤੀ 21 ਕਰੋੜ ਤੋਂ ਜ਼ਿਆਦਾ ਸੀ ਜਿਹੜੀ 2014-15 ‘ਚ ਘੱਟ ਕੇ 19.46 ਕਰੋੜ ‘ਤੇ ਆ ਗਈ। ਭਾਰਤ ਨੇ ਭੁੱਖਮਰੀ ਦੇ ਸ਼ਿਕਾਰ ਲੋਕਾਂ ਦਾ ਅਨੁਪਾਤ ਘੱਟ ਕਰਨ ਲਈ ਕਈ ਵੱਡੇ ਕਦਮ ਚੁੱਕੇ।
ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਆਸ ਪ੍ਰਗਟਾਈ ਜਾ ਰਹੀ ਹੈ ਕਿ ਭਾਰਤ ਦੇ ਵੱਡੀ ਗਿਣਤੀ ਸਮਾਜਿਕ ਪ੍ਰੋਗਰਾਮਾਂ ਜ਼ਰੀਏ ਭੁੱਖਮਰੀ ਤੇ ਗਰੀਬੀ ਨਾਲ ਲੜਾਈ ਨਿਰੰਤਰ ਜਾਰੀ ਰਹੇਗੀ। ਚੀਨ ‘ਚ 1990-92 ‘ਚ ਭੁੱਖਮਰੀ ਦਾ ਸ਼ਿਕਾਰ ਲੋਕਾਂ ਦੀ ਗਿਣਤੀ 28. 9 ਕਰੋੜ ਸੀ ਜੋ 2014-15 ‘ਚ ਘੱਟ ਕੇ 13.38 ਕਰੋੜ ‘ਤੇ ਆ ਗਈੇ।
ਰਿਪੋਰਟ ਅਨੁਸਾਰ 129 ਦੇਸ਼ਾਂ ‘ਚੋਂ 72 ਨੇ ਕੁਪੋਸ਼ਣ ਦੇ ਸ਼ਿਕਾਰ ਲੋਕਾਂ ਦੀ ਗਿਣਤੀ ਨੂੰ ਘੱਟ ਕਰਨ ਦੇ ਟੀਚੇ ਨੂੰ 2015 ਤੱਕ ਪੂਰਾ ਕੀਤਾ।
