ਚੰਡੀਗੜ੍ਹ (9 ਸਤੰਬਰ, 2014):ਸੰਘਰਸ਼ਸ਼ੀਲ ਸਿੱਖ ਖਾੜਕੂਆਂ ਦੇ ਪਰਿਵਾਰਾਂ ਅਤੇ ਬੀਬੀਆਂ ‘ਤੇ ਪੁਲਿਸ ਹਿਰਾਸਤ ਵਿੱਚ ਬੇਤਹਾਸ਼ਾ ਜ਼ੁਰਮ ਕਰਨ ਵਾਲੇ ਬਦਨਾਮ ਪੁਲਿਸ ਕੈਟ ਗੁਰਮੀਤ ਪਿੰਕੀ ਦੀ ਰਿਹਾਈ ਦੇ ਵਿਰੋਧ ਵਿੱਚ ਲੁਧਿਆਣਾ ਨਿਵਾਸੀ ਅਵਤਾਰ ਸਿੰਘ ਨੇ ਹਾਈ ਕੋਰਟ ਵਿੱਚ ਪਟੀਸ਼ਨ ਦਰਜ਼ ਕਰਕੇ ਰਾਜ ਸਰਕਾਰ ਖ਼ਾਸਕਰ ਪੁਲਿਸ ਵਿਭਾਗ ‘ਤੇ ਮੁੱਢੋਂ ਹੀ ‘ਮਿਹਰਬਾਨ’ ਰਿਹਾ ਹੋਣ ਦੇ ਦੋਸ਼ ਲਗਾਏ ਗਏ ਹਨ।
ਪੰਜਾਬ ਪੁਲਿਸ ਦੇ ਬਰਖ਼ਾਸਤ ਇੰਸਪੈਕਟਰ ਅਤੇ ਖਾੜਕੂਵਾਦ ਦੌਰਾਨ ‘ਪੁਲਿਸ ਕੈਟ’ ਰਹਿ ਚੁੱਕੇ ਗੁਰਮੀਤ ਸਿੰਘ ਪਿੰਕੀ ਨੂੰ ਲੰਘੇ ਮਈ ਮਹੀਨੇ ਹੀ ਵਿਸ਼ੇਸ਼ ਸਜ਼ਾ ਮੁਆਫ਼ੀ ਦੇ ਕੇ ਜੇਲ੍ਹ ਤੋਂ ਰਿਹਾਅ ਕਰ ਕਰ ਦਿੱਤਾ ਸੀ।
ਲੁਧਿਆਣਾ ਵਾਸੀ ਅਮਰੀਕ ਸਿੰਘ (58), ਜਿਸ ਦੇ ਇਕਲੌਤੇ ਪੁੱਤਰ ਅਵਤਾਰ ਸਿੰਘ ਨੂੰ ਪਿੰਕੀ ਨੇ 7 ਜਨਵਰੀ, 2001 ਨੂੰ ਬੇਦੋਸ਼ੇ ਹੀ ਗੋਲੀ ਮਾਰ ਕਤਲ ਕਰ ਦਿੱਤਾ ਸੀ, ਵੱਲੋਂ ਅੱਜ ਇੱਕ ਜਨਹਿਤ ਪਟੀਸ਼ਨ ਦਾਇਰ ਕਰਦਿਆਂ ਆਪਣੇ ਪੁੱਤਰ ਦੇ ਮੁੱਖ ਕਾਤਲ ਨੂੰ ਨਾ ਸਿਰਫ਼ ਮੁੜ ਹਿਰਾਸਤ ‘ਚ ਲੈ ਕੇ ਰਹਿੰਦੀ ਸਜ਼ਾ ਪੂਰੀ ਹੋਣ ਤੱਕ ਜੇਲ੍ਹੀਂ ਡੱਕਣ ਦੀ ਫ਼ਰਿਆਦ ਕੀਤੀ ਗਈ ਹੈ, ਬਲਕਿ ਪਿੰਕੀ ਨੂੰ ਉਸਦੀ ਅਗਾਉਂ ਰਿਹਾਈ ਤੋਂ ਐਨ ਪਹਿਲਾਂ ਮਹਿਜ਼ ਡੇਢ ਸਾਲ ਦੌਰਾਨ ਹੀ ਨਿਯਮਾਂ ਤੋਂ ਉਲਟ ਛੇ ਵਾਰ ਪੈਰੋਲ ‘ਤੇ ਬਾਹਰ ਕੱਢਣ ਨੂੰ ਵੀ ਚੁਣੌਤੀ ਦਿੱਤੀ ਹੈ।
ਪਿੰਕੀ ਦੀ ਸਜ਼ਾ ਮੁਆਫ਼ੀ ਵਿਰੁੱਧ ਅਮਰੀਕ ਸਿੰਘ ਦੀ ਇਸ ਪਟੀਸ਼ਨ ‘ਤੇ ਬੁੱਧਵਾਰ ਨੂੰ ਹਾਈਕੋਰਟ ਦੇ ਜਸਟਿਸ ਕੇ. ਕਾਨਨ ਦੇ ਬੈਂਚ ਵੱਲੋਂ ਸੁਣਵਾਈ ਕੀਤੀ ਜਾ ਰਹੀ ਹੈ।
