ਫ਼ਰੀਦਕੋਟ (5 ਫ਼ਰਵਰੀ, 2016): ਪੱਤਰਕਾਰ ਦੀ ਕੁੱਟਮਾਰ ਕਰਕੇ ਕੈਮਰਾ ਖੋਹਣ ਦੇ ਕੇਸ ਵਿੱਚ ਸੁਖਬੀਰ ਬਾਦਲ ਬਾਅਦ ਦੁਪਹਿਰ ਜੁਡੀਸ਼ੀਅਲ ਮੈਜਿਸਟਰੇਟ ਸਤੀਸ਼ ਕੁਮਾਰ ਦੀ ਅਦਾਲਤ ‘ਚ ਪੇਸ਼ ਹੋਏ ਤੇ ਜੱਜ ਸਾਹਮਣੇ ਬਿਆਨ ਦਰਜ ਕਰਵਾਏ । ਉਨ੍ਹਾਂ ਖਿ਼ਲਾਫ਼ ਚੱਲ ਰਹੇ ਕਰੀਬ ਦਸ ਸਾਲ ਪੁਰਾਣੇ ਫ਼ੌਜਦਾਰੀ ਮੁਕੱਦਮੇ ‘ਚ ਸ. ਬਾਦਲ ਨੂੰ ਨਿੱਜੀ ਤੌਰ ‘ਤੇ ਪੇਸ਼ ਹੋਣਾ ਪਿਆ ।
ਸ: ਬਾਦਲ ਨੇ ਆਪਣੇ ਬਿਆਨਾਂ ‘ਚ ਉਨ੍ਹਾਂ ‘ਤੇ ਨਰੇਸ਼ ਸਹਿਗਲ ਵੱਲੋਂ ਦਰਜ ਕਰਵਾਏ ਮਾਮਲੇ ਨੂੰ ਝੂਠਾ ਤੇ ਬੇ-ਬੁਨਿਆਦ ਕਿਹਾ ਤੇ ਆਪਣੇ ਆਪ ਨੂੰ ਇਸ ਮਾਮਲੇ ‘ਚ ਬੇ-ਕਸੂਰ ਦੱਸਿਆ । ਅਦਾਲਤ ਨੇ ਬਿਆਨ ਦਰਜ ਕਰਨ ਤੋਂ ਬਾਅਦ ਇਸ ਮਾਮਲੇ ਦੀ ਸੁਣਵਾਈ 25 ਫਰਵਰੀ ਤੱਕ ਮੁਲਤਵੀ ਕਰ ਦਿੱਤੀ ਕਿਉਂਕਿ ਸ: ਬਾਦਲ 25 ਫਰਵਰੀ ਨੂੰ ਆਪਣੀ ਸਫ਼ਾਈ ਦੇ ਗਵਾਹ ਅਦਾਲਤ ਸਾਹਮਣੇ ਪੇਸ਼ ਕਰਨਗੇ ।
ਦੱਸਣਯੋਗ ਹੈਦੱਸਣਯੋਗ ਹੈ ਕਿ ਪੱਤਰਕਾਰ ਦੀ ਕੁੱਟਮਾਰ ਦੀ ਘਟਨਾ 1999 ਦੀਆਂ ਲੋਕ ਸਭਾ ਚੋਣਾਂ ਵਾਲੇ ਵਾਪਰੀ ਸੀ ਅਤੇ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਦੇ ਹੁਕਮਾਂ ‘ਤੇ ਜੂਨ 2006 ਵਿਚ ਸੁਖਬੀਰ ਸਿੰਘ ਬਾਦਲ ਖਿਲਾਫ਼ ਸਿਟੀ ਪੁਲਿਸ ਥਾਣਾ ਕੋਟਕਪੂਰਾ ਵਿਖੇ ਪਰਚਾ ਦਰਜ ਹੋਇਆ ਸੀ। ਮੁੱਦਈ ਧਿਰ ਇਸ ਮੁਕਦਮੇ ‘ਚ ਆਪਣੇ ਕਰੀਬ ਇਕ ਦਰਜਨ ਗਵਾਹ ਭੁਗਤਾ ਚੁੱਕੀ ਹੈ। ਉਪ-ਮੁੱਖ ਮੰਤਰੀ ਇਸ ਮੁਕਦਮੇ ‘ਚ ਕਰੀਬ ਅੱਠ ਸਾਲ ਬਾਅਦ ਅਦਾਲਤ ਸਾਹਮਣੇ ਨਿੱਜੀ ਤੌਰ ‘ਤੇ ਪੇਸ਼ ਹੋਣਗੇ ।ਇਸ ਤੋਂ ਪਹਿਲਾਂ ਉਨ੍ਹਾਂ ਨੂੰ ਨਿੱਜੀ ਪੇਸ਼ੀ ਤੋਂ ਛੋਟ ਮਿਲੀ ਹੋਈ ਸੀ ।
