ਪਟਿਆਲਾ: ਮੀਡੀਆ ਰਿਪੋਰਟ ਮੁਤਾਬਕ ਤਿੰਨ ਨਸ਼ੇੜੀ ਸਰਕਾਰੀ ਨਸ਼ਾ ਛੁਡਾਊ ਕੇਂਦਰ ਵਿਚੋਂ ਭੱਜ ਗਏ, ਉਹ ਜ਼ਬਰਦਸਤੀ ਮਿਨੀ ਬਸ ਨੂੰ ਹਾਈਜੈਕ ਕਰਕੇ ਉਲਟ ਦਿਸ਼ਾ ’ਚ 10 ਕਿਲੋਮੀਟਰ ਤਕ ਲੈ ਗਏ ਫਿਰ ਬਸ ’ਚੋਂ ਛਾਲ ਮਾਰ ਦਿੱਤੀ।
ਇਹ ਡਰਾਮਾ ਐਤਵਾਰ ਦੀ ਸਵੇਰੇ 15 ਮਿੰਟ ਤਕ ਚੱਲਿਆ।
ਹਿੰਦੁਸਤਾਨ ਟਾਈਮਜ਼ ਮੁਤਾਬਕ ਉਨ੍ਹਾਂ ਤਿੰਨਾਂ ਵਿਚ ਕੁਲਵਿੰਦਰ ਸਿੰਘ ਨਾਭਾ, ਗੁਰਮੀਤ ਸਿੰਘ ਧਨੌਰੀ ਅਤੇ ਹਰਦੀਪ ਸਿੰਘ ਘਨੌਰ ਸਨ, ਤਿੰਨਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ।
ਮਿਲੀ ਜਾਣਕਾਰੀ ਮੁਤਾਬਕ ਬਸ ਪੰਜਾਬੀ ਯੂਨੀਵਰਸਿਟੀ ਤੋਂ ਪ੍ਰਤਾਪ ਨਗਰ ਜਾ ਰਹੀ ਸੀ। ਬਸ ਡਰਾਈਵਰ ਸੰਤੋਖ ਸਿੰਘ ਨੇ ਦੱਸਿਆ ਕਿ ਜਦੋਂ ਬਸ ਬਡੂੰਗਰ ਪਹੁੰਚੀ ਤਾਂ ਤਿੰਨੋਂ ਬਸ ਵਿਚ ਦਾਖਲ ਹੋ ਗਏ। ਉਨ੍ਹਾਂ ’ਚੋਂ ਇਕ ਨੇ ਡਰਾਈਵਰ ਦੀ ਗਰਦਨ ’ਤੇ ਚਾਕੂ ਰੱਖ ਦਿੱਤਾ, ਬਾਕੀ ਦੋਹਾਂ ਕੋਲ ਲਕੜੀ ਦੇ ਡੰਡੇ ਸਨ। ਡਰਾਈਵਰ ਨੇ ਦੱਸਿਆ, “ਉਨ੍ਹਾਂ ਮੈਨੂੰ ਮਜਬੂਰ ਕੀਤਾ ਕਿ ਬਸ ਤੇਜ ਰਫਤਾਰ ਨਾਲ ਸ਼ਹਿਰ ਤੋਂ ਬਾਹਰ ਨਾਭਾ ਵੱਲ ਲੈ ਚੱਲ। ਜਦੋਂ ਬਸ ਪਿੰਡ ਕਲਿਆਣ ਪਹੁੰਚੀ ਤਾਂ ਉਨ੍ਹਾਂ ਮੈਨੂੰ ਬਸ ਹੌਲੀ ਕਰਨ ਲਈ ਕਿਹਾ ਤਿੰਨੋ ਛਾਲਾਂ ਮਾਰ ਕੇ ਭੱਜ ਗਏ”।
ਉਸਨੇ ਦੱਸਿਆ ਕਿ ਉਨ੍ਹਾਂ ਨੇ ਸਵਾਰੀਆਂ ਨੂੰ ਪੁਲਿਸ ਨੂੰ ਫੋਨ ਨਹੀਂ ਕਰਨ ਦਿੱਤਾ, ਪਰ ਜਦੋਂ ਇਕ ਸਵਾਰੀ ਨੇ ਪੁਲਿਸ ਨੂੰ ਫੋਨ ਕਰਨ ਵਿਚ ਕਾਮਯਾਬੀ ਹਾਸਲ ਕਰ ਲਈ ਤਾਂ ਉਹ ਭੱਜ ਗਏ। ਸਹਾਇਕ ਸਬ ਇੰਸਪੈਕਟਰ ਗੁਰਨਾਮ ਸਿੰਘ ਨੇ ਕਿਹਾ ਕਿ ਪੁਲਿਸ ਨੇ ਪਰਚਾ ਦਰਜ ਕਰ ਲਿਆ ਅਤੇ ਉਨ੍ਹਾਂ ਦੀ ਭਾਲ ਜਾਰੀ ਹੈ। ਗੁਰਨਾਮ ਸਿੰਘ ਨੇ ਕਿਹਾ ਤਿੰਨੋਂ ਸਮੈਕ ਪੀਣ ਦੇ ਆਦੀ ਹਨ, ਉਨ੍ਹਾਂ ਦੇ ਮਾਪਿਆਂ ਨੇ ਉਨ੍ਹਾਂ ਤਿੰਨਾਂ ਨੂੰ 4 ਮਈ ਨੂੰ ਨਸ਼ਾ ਛੁਡਾਉਣ ਲਈ ਹਸਪਤਾਲ ਦਾਖਲ ਕਰਵਾਇਆ ਸੀ।
