ਦਿੱਲੀ: ਅੱਜ ਦਿੱਲੀ ਵਿੱਚ ਇੱਕ ਵਾਰ ਫੇਰ ਵਹਿਸ਼ਿਆਨਾ ਕਾਰੇ ਨੂੰ ਅੰਜਾਮ ਦਿੰਦੇ ਹੋਏ 6 ਬੰਦਿਆਂ ਵੱਲੋਂ ਇੱਕ 14 ਸਾਲ ਦੀ ਨਬਾਲਗ ਬੱਚੀ ਦਾ ਚਲਦੀ ਕਾਰ ਵਿੱਚ ਬਲਾਤਕਾਰ ਕੀਤਾ ਗਿਆ।ਪੁਲਿਸ ਨੂੰ ਛੱਕ ਹੋਣ ਤੇ ਗੱਡੀ ਦਾ ਪਿੱਛਾ ਕੀਤਾ ਗਿਆ, ਜਿਸ ਤੋਂ ਬਾਅਦ ਇਸ ਵਹਿਸ਼ੀ ਕਾਰੇ ਦਾ ਸੱਚ ਸਾਹਮਣੇ ਆਇਆ। ਪੁਲਿਸ ਵੱਲੋਂ ਇਸ ਜੁਲਮ ਦਾ ਹਿੱਸਾ ਪੰਜ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
14 ਸਾਲ ਦੀ ਇਹ ਬੱਚੀ 7ਵੀਂ ਕਲਾਸ ਦੀ ਵਿਦਿਆਰਥਣ ਹੈ।ਪੁਲਿਸ ਅਨੁਸਾਰ ਦੋਸ਼ੀਆਂ ਵਿੱਚੋਂ ਦੋ ਵਿਅਕਤੀਆਂ ਨੂੰ ਕੁੜੀ ਜਾਣਦੀ ਸੀ ਇਸ ਲਈ ਉਹ ਸਕੂਲ ਤੋਂ ਬਾਅਦ ਉਨ੍ਹਾਂ ਨਾਲ ਚਲੇ ਗਈ। ਬਾਅਦ ਵਿੱਚ ਕਾਰ ਵਿੱਚ ਹੋਰ ਵਿਅਕਤੀ ਵੀ ਆ ਗਏ ਤੇ ਉਨ੍ਹਾਂ ਇਸ ਵਹਿਸ਼ੀਆਨਾ ਕਾਰੇ ਨੂੰ ਅੰਜਾਮ ਦਿੱਤਾ।
ਸੂਤਰਾਂ ਅਨੁਸਾਰ ਜਿਸ ਕਾਰ ਵਿੱਚ ਬਲਾਤਕਾਰ ਹੋਇਆ ਉਹ ਕਿਸੇ ਕਾਲ ਸੈਂਟਰ ਨਾਲ ਸੰਬੰਧਿਤ ਹੈ ਜਿੱਥੇ ਇੱਕ ਦੋਸ਼ੀ ਨੌਕਰੀ ਕਰਦਾ ਹੈ।
ਪੁਲਿਸ ਵੱਲੋਂ ਗ੍ਰਿਫਤਾਰ ਕੀਤੇ ਗਏ ਪੰਜ ਵਿਅਕਤੀਆਂ ਦੀ ਪਛਾਣ ਰਮੇਸ਼, ਨਰਿੰਦਰ, ਰਾਹੁਲ, ਸੰਦੀਪ ਅਤੇ ਸੂਰਜ ਵਜੋਂ ਹੋਈ ਹੈ।
ਜਿਕਰਯੋਗ ਹੈ ਕਿ ਪੱਛਮੀ ਦਿੱਲੀ ਦੇ ਰਨਹੋਲਾ ਇਲਾਕੇ ਵਿੱਚ ਜਿੱਥੇ ਇਹ ਘਟਨਾ ਘਟੀ, ਉੱਥੇ ਅਕਤੂਬਰ ਮਹੀਨੇ ਵਿੱਚ ਇੱਕ ਪਾਰਕ ਵਿੱਚ 2 ਸਾਲ ਦੀ ਬੱਚੀ ਨਾਲ ਹੋਏ ਸਮੂਹਿਕ ਬਲਾਤਕਾਰ ਦੀ ਘਟਨਾ ਵੀ ਸਾਹਮਣੇ ਆਈ ਸੀ। ਭਾਰਤ ਦੀ ਰਾਜਧਾਨੀ ਦਿੱਲੀ ਵਿੱਚ ਹੋ ਰਹੀਆਂ ਇਹ ਘਟਨਾਵਾਂ ਭਾਰਤ ਅੰਦਰ ਔਰਤ ਦੀ ਅਸੁਰੱਖਿਆ ਸੰਬੰਧੀ ਵੱਡਾ ਸੰਕੇਤ ਹੈ ਜਿਸ ਤੇ ਸਮਾਜ ਨੂੰ ਵੀਚਾਰ ਕਰਨ ਦੀ ਲੋੜ ਹੈ।
