ਨਵੀਂ ਦਿੱਲੀ: ਦਿੱਲੀ ਦੇ ਲਾਹੌਰੀ ਗੇਟ ਦੇ ਕੋਲ ਨਵਾਂ ਬਜ਼ਾਰ ਇਲਾਕੇ ‘ਚ ਧਮਾਕਾ ਹੋਣ ਦੀ ਖ਼ਬਰ ਆਈ ਹੈ। ਇਸ ਧਮਾਕੇ ‘ਚ ਇਕ ਬੰਦੇ ਦੀ ਮੌਤ ਅਤੇ ਤਿੰਨ ਗੰਭੀਰ ਜ਼ਖਮੀ ਹੋ ਗਏ ਹਨ। ਜਦਕਿ 7 ਤੋਂ ਵੱਧ ਲੋਕਾਂ ਨੂੰ ਛੋਟੇ ਜ਼ਖਮ ਲੱਗੇ ਹਨ।
ਇਹ ਨਵਾਂ ਬਜ਼ਾਰ ਦੀ ਭੀੜੀਆਂ ਗਲੀਆਂ ਹਨ। ਇਥੇ ਅਨਾਜ ਦੀਆਂ ਦੁਕਾਨਾਂ ਹਨ। ਇਥੇ ਇਕ ਬੰਦਾ ਆਪਣੇ ਸਿਰ ‘ਤੇ ਇਕ ਥੈਲਾ ਲੈ ਕੇ ਜਾ ਰਿਹਾ ਸੀ, ਜਿਸ ਵਿਚ ਧਮਾਕਾ ਹੋ ਗਿਆ ਅਤੇ ਉਸ ਥੈਲਾ ਲਿਜਾਣ ਵਾਲੇ ਦੀ ਮੌਤ ਹੋ ਗਈ। ਉਸ ਥੈਲੇ ‘ਚ ਧਮਾਕਾਖੇਜ਼ ਸਮੱਗਰੀ ਸੀ ਜਾਂ ਪਟਾਕੇ ਸੀ, ਹਾਲੇ ਇਸ ਦੀ ਜਾਂਚ ਚੱਲ ਰਹੀ ਹੈ।
ਫਿਲਹਾਲ ਪੁਲਿਸ ਮੌਕੇ ‘ਤੇ ਹੈ। ਧਮਾਕਾ ਇੰਨਾ ਜ਼ਬਰਦਸਤ ਸੀ ਕਿ 100 ਮੀਟਰ ਦੇ ਦਾਇਰੇ ਦੀਆਂ ਇਮਾਰਤਾਂ ਦੇ ਸ਼ੀਸ਼ੇ ਟੁੱਟ ਗਏ। ਇਸ ਘਟਨਾ ਦੀ ਸੀਸੀਟੀਵੀ ਫੁਟੇਜ ਵੀ ਸਾਹਮਣੇ ਆਈ ਹੈ, ਜਿਸ ਵਿਚ ਸਾਫ ਦਿਖਾਈ ਦੇ ਰਿਹਾ ਹੈ ਕਿ ਧਮਾਕਾ ਕਿਵੇਂ ਹੋਇਆ ਅਤੇ ਲੋਕ ਇੱਧਰ-ਉੱਧਰ ਭੱਜਣ ਲੱਗੇ।
ਚਸ਼ਮਦੀਦਾਂ ਦਾ ਕਹਿਣਾ ਹੈ ਕਿ ਇਹ ਪਟਾਕਿਆਂ ਦਾ ਧਮਾਕਾ ਨਹੀਂ ਹੈ ਕਿਉਂਕਿ ਜੇ ਪਟਾਕਿਆਂ ਦਾ ਧਮਾਕਾ ਹੁੰਦਾ ਤਾਂ ਥੋੜੀ ਦੇਰ ਤਕ ਪਟਾਕੇ ਵੱਜਣ ਦਾ ਸ਼ੋਰ ਆਉਂਦਾ ਰਹਿੰਦਾ। ਘਟਨਾ ਵਾਲੀ ਥਾਂ ਤੋਂ ਪੁਲਿਸ ਨੂੰ ਕੁਝ ਕਿੱਲਾਂ, ਲੋਹੇ ਦੇ ਟੁਕੜੇ ਵੀ ਮਿਲੇ ਹਨ।
ਮੌਕੇ ‘ਤੇ ਮੌਜੂਦ ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਸ਼ੁਰੂਆਤੀ ਜਾਂਚ ਤੋਂ ਤਾਂ ਲੱਗ ਰਿਹਾ ਹੈ ਕਿ ਧਮਾਕਾ ਦਿਵਾਲੀ ਦੇ ਪਟਾਕਿਆਂ ‘ਚ ਸੀ। ਫੌਰੈਂਸਿਕ ਮਾਹਰਾਂ ਦੀ ਟੀਮ ਜਾਂਚ ਕਰ ਰਹੀ ਹੈ। ਪੁਲਿਸ ਭਾਰਤ-ਪਾਕਿਸਤਾਨ ਸਰਹੱਦ ‘ਤੇ ਤਣਾਅ ਨੂੰ ਵੀ ਇਸ ਧਮਾਕੇ ਨਾਲ ਜੋੜ ਕੇ ਜਾਂਚ ਕਰ ਰਹੀ ਹੈ।
ਇਸ ਘਟਨਾ ਤੋਂ ਬਾਅਦ ਭਾਰਤ ਦੇ ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਨੇ ਦਿੱਲੀ ਦੇ ਪੁਲਿਸ ਕਮਿਸ਼ਨਰ ਅਲੋਕ ਵਰਮਾ ਨਾਲ ਗੱਲ ਕੀਤੀ। ਰਾਜਨਾਥ ਸਿੰਘ ਫਿਲਹਾਲ ਬਹਿਰੀਲ ‘ਚ ਹਨ।
