ਵਾਸ਼ਿੰਗਟਨ (18 ਸਤੰਬਰ, 2014): ਅਮਰੀਕਾ ਤੋਂ ਹਰਿਮੰਦਰ ਸਾਹਿਬ ਯਾਤਰਾ ਕਰਨ ਆਏ ਵਿਦਿਆਰਥੀਆਂ ਨੇ ਜਦ ਦਰਬਾਰ ਸਾਹਿਬ ਅੰਮ੍ਰਿਤਸਰ ਦੇ ਗੁਰੂ ਰਾਮਦਾਸ ਦਾਸ ਲੰਗਰ ਹਾਲ ਵੱਡੀ ਗਿਣਤੀ ਵਿੱਚ ਲੰਗਰ ਛਕਦੇ ਵੇਖਿਆਂ ਤਾਂ ਉਹ ਸਿੱਖ ਧਰਮ ਵੱਲੋਂ ਚਲਾਈ ਜਾ ਰਹੀ ਲੰਗਰ ਦੀ ਪ੍ਰਥਾ ਤੋਂ ਇੰਨੇ ਪ੍ਰਭਾਵਿਤ ਹੋਏ ਕਿ ਉਨ੍ਹਾਂ ਨੇ ਐਨ ਅਰਬਰ ਵਿਚ ਮਿਸ਼ੀਗਨ ਯੂਨੀਵਰਸਿਟੀ ਵਿਖੇ ਇਕ ਦਿਨ ਲਈ ਲੰਗਰ ਦਾ ਪ੍ਰਬੰਧ ਕੀਤਾ ਹੈ।
ਇਹ ਅਮਰੀਕੀ ਵਿਦਿਆਰਥੀ ਇਸ ਸਾਲ ਦੇ ਸ਼ੁਰੂ ਵਿਚ ਇੱਥੇ ਯਾਤਰਾ ‘ਤੇ ਆਏ ਸਨ।
ਮਿਸ਼ੀਗਨ ਯੂਨੀਵਰਸਿਟੀ ਦੇ ਵਿਦਿਆਰਥੀਆਂ ਨੇ ਗਰਮੀਆਂ ਵਿਚ ਦਰਬਾਰ ਸਾਹਿਬ ਅੰਮ੍ਰਿਤਸਰ ਦੀ ਯਾਤਰਾ ਕੀਤੀ ਸੀ ਜਿਥੇ ਉਨ੍ਹਾਂ ਹਰ ਰੋਜ਼ ਲਗਭਗ 60000 ਸੰਗਤ ਨੂੰ ਲੰਗਰ ਛਕਦੇ ਦੇਖਿਆ।
ਇਕ ਮੀਡੀਆ ਰਿਲੀਜ਼ ਵਿਚ ਦੱਸਿਆ ਗਿਆ ਕਿ ਭੋਜਨ ਨੂੰ ਡੱਬਾ ਬੰਦ ਕਰਕੇ 19 ਸਤੰਬਰ ਨੂੰ ਸਾਰਾ ਦਿਨ ਵੰਡਿਆ ਜਾਵੇਗਾ।
ਵਿਦਿਆਰਥੀਆਂ ਨੂੰ ਆਸ ਹੈ ਕਿ ਉਹ ਲਗਭਗ 10 ਹਜ਼ਾਰ ਵਿਅਕਤੀਆਂ ਨੂੰ ਮੁਫਤ ਭੋਜਨ ਛੁਕਾਉਣਗੇ। ਬਚਿਆ ਭੋਜਨ ਕਿਸੇ ਪਨਾਹਗਾਹ ਨੂੰ ਦਾਨ ਕਰ ਦਿੱਤਾ ਜਾਵੇਗਾ।
ਇਲੈਕਟ੍ਰੀਕਲ ਇੰਜਨੀਅਰਿੰਗ ਅਤੇ ਕੰਪਿਊਟਰ ਸਾਇੰਸ ਦੇ ਪ੍ਰੋਫੈਸਰ ਜਸਪ੍ਰੀਤ ਸਿੰਘ ਜਿਨ੍ਹਾਂ ਭਾਰਤ ਦੌਰੇ ‘ਤੇ ਆਏ ਅਮਰੀਕੀ ਵਿਦਿਆਰਥੀਆਂ ਦੀ ਅਗਵਾਈ ਕੀਤੀ ਸੀ ਨੇ ਕਿਹਾ ਕਿ ਅਮਰੀਕੀ ਸਮਾਜ ਨੂੰ ਥਾਵਾਂ ਦੀ ਲੋੜ ਹੈ ਜਿਥੇ ਅਮੀਰ ਤੇ ਗਰੀਬ, ਸਾਰੀਆਂ ਨਸਲਾਂ ਅਤੇ ਧਰਮਾਂ ਦੇ ਲੋਕ ਇਕੱਠੇ ਹੋ ਸਕਣ।
ਇਸ ਯੂਨੀਵਰਸਿਟੀ ਦਾ ਲੰਗਰ ਮਾਧਿਅਮ ਮੁਹਾਈਆ ਕਰ ਸਕਦਾ ਹੈ। ਜੂਨ ਮਹੀਨੇ ਦਰਬਾਰ ਸਾਹਿਬ ਆਏ 13 ਅਮਰੀਕੀ ਵਿਦਿਆਰਥੀ ਹਰ ਰੋਜ਼ ਤੜਕੇ ਉਠ ਕੇ ਕਾਰ ਸੇਵਾ ਕਰਦੇ ਸਨ। ਵਿਦਿਆਰਥੀਆਂ ਦੀ ਭਾਰਤੀ ਯਾਤਰਾ ਮਿਸ਼ੀਗਨ ਯੂਨੀਵਰਸਿਟੀ ਦੀ ਅੰਡਰ ਗਰੈਜੂਏਟ ਪ੍ਰੋਗਰਾਮ ਲਈ ਵਿਸ਼ਵ ਅੰਤਰ ਸਭਿਆਚਾਰਕ ਤਜਰਬੇ ਦਾ ਹਿੱਸਾ ਸੀ।
