ਬੇਜਿੰਗ: ਚੀਨ ਵੱਲੋਂ ਚੰਨ ਉੱਤੇ ਕਪਾਹ ਉਗਾਉਣ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ। ਅਸਲ ਵਿੱਚ ਬੀਤੇ ਦਿਨੀਂ 3 ਜਨਵਰੀ ਨੂੰ ਚੀਨ ਨੇ ਚੰਨ ਦੇ ਦੂਰ ਵਾਲੇ ਪਾਸੇ (ਉਹ ਪਾਸਾ ਜੋ ਧਰਤੀ ਤੋਂ ਵਿਖਾਈ ਨਹੀ ਦਿੰਦਾ) ਉੱਤੇ ਇਕ ਪੁਲਾੜੀ ਜਹਾਜ਼ ਭੇਜਿਆ ਸੀ। ਇਸ ਜਹਾਜ਼ ਵਿੱਚ ਚੀਨ ਨੇ ਚੰਨ ਉੱਤੇ ਕਪਾਹ, ਆਲੂ, ਸਰੋਂ ਅਤੇ ਖਮੀਰ ਦੇ ਬੀਜ ਭੇਜੇ ਗਏ ਸਨ।ਇਹ ਬੀਅ ਧਰਤੀ ਤੋਂ ਭੇਜੀ ਗਈ ਮਿੱਟੀ ਨਾਲ ਖਾਸ ਤਰ੍ਹਾਂ ਦੇ ਡੱਬਿਆਂ ਵਿੱਚ ਭੇਜੇ ਗਏ ਸਨ।
ਹੁਣ ਚੀਨ ਨੇ ਦਾਅਵਾ ਕੀਤਾ ਹੈ ਕਿ ਇਹਨ੍ਹਾਂ ਵਿੱਚੋਂ ਕਪਾਹ ਦਾ ਬੀਅ ਫੁੱਟ ਪਿਆ ਹੈ। ਇਹ ਆਪਣੀ ਤਰ੍ਹਾਂ ਦਾ ਪਹਿਲਾਂ ਤਜਰਬਾ ਹੈ ਜਦੋਂ ਧਰਤੀ ਦੇ ਲੋਕਾਂ ਨੇ ਧਰਤੀ ਤੋਂ ਦੂਰ ਪੁਲਾੜਾਂ ਵਿੱਚ ਕੋਈ ਚੀਜ਼ ਉਗਾਈ ਹੋਵੇ। ਚੀਨ ਦਾ ਕਹਿਣਾ ਹੈ ਕਿ ਆਉਂਦੇ ਸਮੇਂ ਵਿੱਚ ਇਹ ਬੂਟੇ ਪੁਲਾੜ ਯਾਤਰੀਆਂ ਲਈ ਭੋਜਨ, ਤੇਲ ਤੇ “ਆਕਸੀਜਨ” ਪੈਦਾ ਕਰ ਸਕਦੇ ਹਨ।
ਇਸ ਤਜ਼ਰਬੇ ਵਿੱਚ ਸ਼ਾਮਲ ਕੀਤੇ ਗਏ ਬੂਟੇ ਵੱਧ-ਘੱਟ ਤਾਪਮਾਨ ਸਹਿ ਸਕਦੇ ਹਨ ਅਤੇ ‘ਰੇਡੀਏਸ਼ਨ’ ਸਹਿ ਸਕਦੇ ਹਨ। ਚੀਨ ਉੱਤੇ ਕੁਦਰਤੀ ਖਿੱਚ (ਗਰੈਵਟੀ) ਘੱਟ ਹੈ ਅਤੇ ਓਥੇ ‘ਰੇਡੀਏਸ਼ਨ’ ਵੱਧ ਹੈ। ਅਜਿਹੇ ਵਿੱਚ ਵਿਗਿਆਨੀ ਚੀਨ ਦੇ ਇਸ ਤਜ਼ਰਬੇ ਨੂੰ ਅਹਿਮ ਮੰਨ ਰਹੇ ਹਨ।
