ਅੰਮ੍ਰਿਤਸਰ (ਨਰਿੰਦਰ ਪਾਲ ਸਿੰਘ): ਕੇਂਦਰ ਸਰਕਾਰ ਵਲੋਂ 500 ਅਤੇ 1000 ਰੁਪਏ ਦੇ ਨੋਟ ਰੱਦ ਕਰਨ ਦੇ ਫੈਸਲੇ ਨਾਲ ਜਿਥੇ ਆਮ ਜਨਤਾ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਉਥੇ ਭਾਰਤੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਟਵੀਟ ਜ਼ਰੀਏ ਗੱਲਬਾਤ ਕਰਨ ਵਾਲਿਆਂ ਵਿਚੋਂ ਵੀ ਖਿਲਾਫਤ ਦੀ ਭਾਵਨਾ ਵੇਖਣ ਨੂੰ ਮਿਲੀ ਹੈ।
ਐਨਾ ਲਿਸਟੀਕਲ ਟਵੀਟਰ ਕਾਊਂਟਰ ਦੁਆਰਾ ਜਾਰੀ ਅੰਕੜਿਆਂ ਅਨੁਸਾਰ ਮੋਦੀ ਦੇ ਟਵੀਟ ਪ੍ਰੇਮੀਆਂ ਦੀ ਲਿਸਟ ਵਿਚ ਦੋ ਕਰੋੜ 41 ਲੱਖ 30 ਹਜ਼ਾਰ ਲੋਕ ਸ਼ਾਮਿਲ ਸਨ ਪਰ 9 ਨਵੰਬਰ ਦੀ ਰਾਤ ਨੂੰ ਜਿਉਂ ਹੀ ਮੋਦੀ ਨੇ ਭਾਰਤ ਵਿੱਚ 500 ਤੇ 1000 ਰੁਪਏ ਦੇ ਨੋਟਾਂ ਨੂੰ ਬੰਦ ਕਰਨ ਦਾ ਹੁਕਮ ਸੁਣਾਇਆ ਤਾਂ 10 ਨਵੰਬਰ ਸ਼ਾਮ ਤੀਕ ਮੋਦੀ ਦੀ ਇਹ ਟਵੀਟ ਲਿਸਟ ਦੇ ਅੰਕੜੇ ਵੀ 3 ਲੱਖ 13 ਹਜਾਰ ਘੱਟ ਗਏ। ਜਿਸਦਾ ਸਿੱਧਾ ਅਰਥ ਹੈ ਕਿ 3 ਲੱਖ 13 ਹਜ਼ਾਰ ਲੋਕਾਂ ਨੇ ਨਰਿੰਦਰ ਮੋਦੀ ਦੀ ਸੋਸ਼ਲ ਮੀਡੀਆ ‘ਤੇ ਕਿਸੇ ਲਿਖਤ ਨੂੰ ਪੜ੍ਹਨਾ ਵੀ ਜ਼ਰੂਰੀ ਨਹੀਂ ਸਮਝਿਆ। ਸੋਸ਼ਲ ਮੀਡੀਆ ਮੁਲਾਂਕਣ ਨਾਲ ਜੁੜੀ ਇੱਕ ਹੋਰ ਸੰਸਥਾ ਟਰੈਕਲਾਟਿਕਸ ਅਨੁਸਾਰ ਮੋਦੀ ਦੇ ਟਵੀਟ ਨਾਲੋਂ ਟੁੱਟਣ ਵਾਲਿਆਂ ਦੀ ਗਿਣਤੀ 3 ਲੱਖ 18 ਹਜ਼ਾਰ ਹੈ।
ਦੱਸਿਆ ਗਿਆ ਹੈ ਕਿ ਸਤੰਬਰ 2015 ਵਿੱਚ ਨਰਿੰਦਰ ਮੋਦੀ ਦੁਆਰਾ ਟਵੀਟ ਦਾ ਸਹਾਰਾ ਲਏ ਜਾਣ ਬਾਅਦ ਮੋਦੀ ਦੇ ਚਾਹੁਣ ਤੇ ਉਸ ਦੇ ਵਿਚਾਰ ਜਾਣਨ ਵਾਲਿਆਂ ਦੀ ਗਿਣਤੀ ਦਿਨੋਂ ਦਿਨ ਵੱਧ ਰਹੀ ਸੀ। ਇੱਕਲੇ ਨਵੰਬਰ ਮਹੀਨੇ ਵਿੱਚ ਹੀ ਇਹ ਗਿਣਤੀ ਪ੍ਰਤੀ ਰੋਜ਼ 25 ਹਜ਼ਾਰ ਸੀ ਤੇ ਇਹ ਗਿਣਤੀ ਕੁਝ ਦਿਨਾਂ ਵਿੱਚ 50 ਹਜ਼ਾਰ ਪ੍ਰਤੀ ਦਿਨ ਵੀ ਪੁੱਜ ਗਈ ਸੀ। ਪਰ ਜਿਉਂ ਹੀ ਮੋਦੀ ਦਾ ਫੈਸਲਾ ਸਾਹਮਣੇ ਆਇਆ ਤਾਂ ਚਾਹੁਣ, ਸੁਨਣ ਤੇ ਜਾਣਨ ਵਾਲਿਆਂ ਦੀ ਸੂਚੀ ਦਾ ਗਰਾਫ ਹੇਠਾਂ ਆ ਡਿੱਗਾ।
