ਲੰਡਨ (9 ਜੁਲਾਈ, 2015): ਬਰਤਾਨੀਆ ਵਿੱਚ ਸਿੱਖਾਂ ਦੀ ਕਾਫੀ ਵੱਸੋਂ ਵਾਲੇ ਸ਼ਹਿਰ ਵਿੱਚ ਪਹਿਲਾਂ ਸਿੱਖ ਸਕੂਲ ਸ਼ੁਰੂ ਕੀਤਾ ਜਾ ਰਿਹਾ ਹੈ।ਸਤੰਬਰ 2015 ਤੋਂ ਸ਼ੁਰੂ ਹੋਣ ਜਾ ਰਹੇ ਇਸ ਸਿੱਖ ਸਕੂਲ ਦਾ ਨਾਮ “ਅਕਾਲ ਅਕੈਡਮੀ” ਰੱਖਿਆ ਗਿਆ ਹੈ।
ਡਰਬੀ ਵਿਚ ਸਿੱਖ ਭਾਈਚਾਰੇ ਦੀ ਵਸੋਂ ਕਾਫ਼ੀ ਹੈ, ਜਿੱਥੇ 50 ਤੋਂ ਵੱਧ ਵਰਿ੍ਹਆਂ ਤੋਂ ਪੰਜਾਬੀ ਪੱਕੇ ਤੌਰ ‘ਤੇ ਵੱਸ ਰਹੇ ਹਨ । ਇਸ ਸ਼ਹਿਰ ਵਿਚ ਸਿੱਖਾਂ ਦਾ ਕਾਫ਼ੀ ਆਧਾਰ ਹੋਣ ਕਰਕੇ ਇੱਥੇ ਚਾਰ ਦੇ ਕਰੀਬ ਗੁਰੂਘਰ ਸਥਾਪਿਤ ਹਨ । ਪ੍ਰੰਤੂ ਇਸ ਦੇ ਬਾਵਜੂਦ ਇੱਥੇ ਸਰਕਾਰੀ ਸਹਿਯੋਗ ਵਾਲਾ ਕੋਈ ਵੀ ਸਿੱਖ ਸਕੂਲ ਨਹੀਂ ਸੀ, ਭਾਵੇਂ ਕਿ ਵੱਖ-ਵੱਖ ਗੁਰੂਘਰਾਂ ਵਿਚ ਪੰਜਾਬੀ ਭਾਸ਼ਾ ਲਈ ਕਲਾਸਾਂ ਲੱਗਦੀਆਂ ਆ ਰਹੀਆਂ ਹਨ ।
ਸਿੰਘ ਸਭਾ ਗੁਰਦੁਆਰਾ ਸਾਹਿਬ ਅਤੇ ਸਿੱਖ ਮਿਊਜ਼ੀਅਮ ਦੇ ਨੇੜੇ ਇਹ ਸਕੂਲ ਦੋ ਸਾਲ ਲਈ ਆਰਜ਼ੀ ਤੌਰ ‘ਤੇ ਹੋਵੇਗਾ । ਉਸ ਤੋਂ ਬਾਅਦ ਪੱਕੇ ਤੌਰ ‘ਤੇ ਸੰਨੀਹਿੱਲ ਵਿਖੇ ਹੋਵੇਗਾ ।
ਟਰੱਸਟ ਦੇ ਚੇਅਰਮੈਨ ਡਾ: ਦਲਜੀਤ ਸਿੰਘ ਵਿਰਕ ਅਨੁਸਾਰ 2020 ਤੱਕ ਇਸ ਸਕੂਲ ‘ਚ 420 ਬੱਚੇ ਹੋਣਗੇ । ਇਸ ਸਕੂਲ ਦੇ ਹੈੱਡ ਟੀਚਰ ਵਿੱਕੀ ਕਾਵਾਹਨਗ ਤੇ ਹੈੱਡ ਆਫ਼ ਦਾ ਸਕੂਲ ਜੂਲੀ ਕੈਨੇਡੀ ਹੋਣਗੇ । ਸਕੂਲ ਦੇ ਟਰੱਸਟੀ ਸ: ਰਾਜਿੰਦਰ ਸਿੰਘ ਪੁਰੇਵਾਲ ਨੇ ਸਥਾਨਿਕ ਗੁਰੂ ਘਰਾਂ ਅਤੇ ਸੰਗਤਾਂ ਵੱਲੋਂ ਦਿੱਤੇ ਗਏ ਸਹਿਯੋਗ ਦਾ ਧੰਨਵਾਦ ਕੀਤਾ ।
