ਮੈਲਬਰਨ (ਤੇਜਸ਼ਦੀਪ ਸਿੰਘ ਅਜਨੌਦਾ): ਆਸਟਰੇਲੀਆ ‘ਚ ਪਹਿਲੀ ਵਾਰ ਵਕਾਰੀ ਕੌਮੀ ਪੁਰਸਕਾਰ ਆਸਟਰੇਲੀਅਨ ਆਫ਼ ਦਾ ਈਯਰ 2017 (ਲੋਕਲ ਹੀਰੋ ਸ਼੍ਰੇਣੀ ਨਦਰਨ ਟੈਰਿਟਰੀ) ਇਸ ਵਾਰ ਇੱਕ ਸਿੱਖ ਨੌਜਵਾਨ ਨੂੰ ਦਿੱਤਾ ਗਿਆ ਹੈ। ਮੂਲਵਾਸੀਆਂ ਦੀ ਬਹੁਗਿਣਤੀ ਵਾਲੀ ਨਦਰਨ ਟੈਰਿਟਰੀ ਖੇਤਰ ‘ਚ ਪਰਿਵਾਰ ਸਮੇਤ ਰਹਿੰਦੇ ਤੇਜਿੰਦਰ ਪਾਲ ਸਿੰਘ ਦੇ ਨਾਮ ਦਾ ਐਲਾਨ ਅੱਜ ਸਰਕਾਰ ਦੀ ਸੰਬੰਧਿਤ ਬਾਡੀ ਵੱਲ੍ਹੋਂ ਕੀਤਾ ਗਿਆ।
ਟੈਰਿਟਰੀ ਦੀ ਰਾਜਧਾਨੀ ਡਾਰਵਿਨ ‘ਚ 2006 ‘ਚ ਪੰਜਾਬ ਤੋਂ ਪਰਵਾਸ ਕਰਕੇ ਆਏ ਤੇਜਿੰਦਰ ਨੂੰ ਇਹ ਐਵਾਰਡ ਨਿੱਜੀ ਤੌਰ ਉੱਤੇ ਲੋੜਵੰਦ ਲੋਕਾਂ ਨੂੰ ਖਾਣਾ ਛਕਾਉਣ ਅਤੇ ਬਣਦੀ ਮਦਦ ਕਰਨ ਲਈ ਦਿੱਤਾ ਗਿਆ ਹੈ ਕਿੱਤੇ ਵੱਜੋਂ ਟੈਕਸੀ ਚਾਲਕ ਦੇ ਤੌਰ ‘ਤੇ ਕੰਮ ਕਰਦੇ ਤੇਜਿੰਦਰ ਨੇ ਇਹ ਕਾਰਜ ਕਰੀਬ ਪਿਛਲੇ 4 ਸਾਲ ਤੋਂ ਆਰੰਭੇ ਹੋਏ ਹਨ। ਉਸਦਾ ਕਹਿਣਾ ਹੈ ਕਿ ਇੱਥੇ ਸ਼ੁਰੂ ‘ਚ ਆ ਕੇ ਵਸਣ ਮੌਕੇ ਉਸਨੂੰ ਆਪਣੀ ਵੱਖਰੀ ਪਛਾਣ ਰੱਖਦਿਆਂ ਨਸਲੀ ਟਿੱਪਣੀਆਂ ਦਾ ਸਾਹਮਣਾ ਵੀ ਕਰਨਾ ਪਿਆ ਉਸ ਸਮੇਂ ਉਸਨੇ ਇਹ ਸੋਚਿਆ ਕਿ ਸਿੱਖਾਂ ਦੀ ਪਛਾਣ ਸਿਧਾਂਤ ਅਤੇ ਮਨੁੱਖਤਾ ਲਈ ਚਲਾਏ ਗਏ ਕਾਰਜਾਂ ਤੋਂ ਲੋਕਾਂ ਨੂੰ ਰੂ-ਬ-ਰੂ ਕਰਵਾਇਆ ਜਾਵੇ ਤਾਂ ਜੋ ਲੋਕ ਸਿੱਖਾਂ ਦੇ ਮੁੱਢ ਤੋਂ ਜਾਣੂ ਹੋ ਸਕਣ। ਇਸ ਮਗਰੋਂ ਉਸਨੇ ਨਿੱਜੀ ਤੌਰ ਉੱਤੇ ਆਪਣੀ ਵੈਨ ‘ਚ ਖਾਣਾ ਰੱਖ ਕੇ ਲੋੜਵੰਦਾਂ ਦੀ ਭੁੱਖ ਮਿਟਾਉਣ ਲਈ ਮਿਸ਼ਨ ਆਰੰਭ ਦਿੱਤਾ।
ਗੁਰੂ ਨਾਨਕ ਸਾਹਿਬ ਨੂੰ ਆਪਣਾ ਪ੍ਰੇਰਣਾਸ੍ਰੋਤ ਦੱਸਦਿਆਂ ਤੇਜਿੰਦਰ ਦਸਦਾ ਹੈ ਕਿ ਦਸਵੰਧ ਤਹਿਤ ਉਸਦਾ ਪਰਿਵਾਰ ਆਪਣੀ ਕਿਰਤ ਚੋਂ ਇਸ ਖਾਣੇ ਦਾ ਪ੍ਰਬੰਧ ਕਰਦੇ ਹਨ। ਜਿਸ ‘ਚ 85 ਕਿਲੋ ਦਾਲ ਅਤੇ ਚੌਲ ਸਮੇਤ ਮਿੱਠਾ ਜਲ ਆਦਿ ਸ਼ਾਮਲ ਹੁੰਦੇ ਹਨ। ਮਹੀਨੇ ਦੇ ਹਰ ਆਖਰੀ ਐਤਵਾਰ ਓਹ ਆਪਣੀ ਵੈਨ ਲੋੜਵੰਦ ਖੇਤਰਾਂ ‘ਚ ਖੜੀ ਕਰਦਾ ਹੈ ਇਸ ਮੌਕੇ ਕਰੀਬ ਡੇਢ ਸੌ ਵਿਅਕਤੀ ਖਾਣਾ ਛਕਦੇ ਹਨ।
ਨਦਰਨ ਟੈਰਿਟਰੀ ਦੇ ਮੁੱਖ ਮੰਤਰੀ ਮਾਇਕਲ ਗਨਰ ਨੇ ਤੇਜਿੰਦਰ ਪਾਲ ਸਿੰਘ ਨੂੰ ਇਸ ਕੌਮੀ ਪੁਰਸਕਾਰ ਲਈ ਮੁਬਾਰਕਾਂ ਦਿੱਤੀਆਂ ਹਨ।
ਆਸਟਰੇਲੀਅਨ ਆਫ਼ ਦ ਈਅਰ ਐਵਾਰਡ ਪ੍ਰਧਾਨ ਮੰਤਰੀ ਵਲੋਂ ਅਗਲੇ ਸਾਲ ਜਨਵਰੀ ‘ਚ ਮੁਲਕ ਦੀ ਰਾਜਧਾਨੀ ਕੈਨਬਰਾ ਵਿੱਚ ਦਿੱਤੇ ਜਾਣਗੇ।
