ਅੰਮ੍ਰਿਤਸਰ: ਦਲ ਖਾਲਸਾ ਨੇ ਕਿਹਾ ਕਿ ਅੰਮ੍ਰਿਤਸਰ ਵਿੱਚ ਸਮਾਪਤ ਹੋਏ ਏਸ਼ੀਆ ਸਿਖਰ ਸੰਮੇਲਨ ਦੌਰਾਨ ਮੋਦੀ ਸਰਕਾਰ ਵਲੋਂ ਪਾਕਿਸਤਾਨ ਦੇ ਵਿਦੇਸ਼ ਮੰਤਰੀ ਸਰਤਾਜ ਅਜ਼ੀਜ਼ ਨੂੰ ਦਰਬਾਰ ਸਾਹਿਬ ਜਾਣ ਤੋਂ ਰੋਕਣਾ, ਭਾਰਤੀ ਲੀਡਰਸ਼ਿਪ ਦੀ ਬਦਨੀਤੀ ਦਰਸਾਉਂਦੀ ਹੈ, ਜਦਕਿ ‘ਸੁਰਖਿਆ ਕਾਰਣ’ ਤਾਂ ਕੇਵਲ ਇੱਕ ਬਹਾਨਾ ਹੈ।
ਪਾਰਟੀ ਪ੍ਰਧਾਨ ਹਰਪਾਲ ਸਿੰਘ ਚੀਮਾ ਨੇ ਕਿਹਾ ਕਿ ਦਰਬਾਰ ਸਾਹਿਬ ਸਿੱਖੀ ਦਾ ਘਰ ਹੈ, ਆਸਥਾ ਦਾ ਕੇਂਦਰੀ ਸਥਾਨ ਹੈ ਅਤੇ ਇਸ ਪਾਵਨ ਜਗ੍ਹਾ ਦੇ ਦਰਸ਼ਨ ਦੀਦਾਰੇ ਤੋਂ ਗੁਆਂਢ ਤੋਂ ਆਏ ਮੇਹਮਾਨ ਨੂੰ ਰੋਕਣਾ ਜਾਂ ਇਜਾਜ਼ਤ ਨਾ ਦੇਣੀ ਕੇਵਲ ਉਸ ਨਾਲ ਹੀ ਘੋਰ ਬੇਇਨਸਾਫੀ ਨਹੀਂ ਸਗੋਂ ਸਿੱਖ ਫਲਸਫੇ ਅਤੇ ਰਵਾਇਤ ਦਾ ਵੀ ਅਪਮਾਨ ਹੈ। ਉਹਨਾਂ ਕਿਹਾ ਕਿ ਦਿੱਲੀ ਸਰਕਾਰ ਦੇ ਇਰਾਦਿਆਂ ਵਿੱਚ ਖੋਟ ਹੈ ਅਤੇ ਉਹ ਸਿੱਖਾਂ ਅਤੇ ਪਕਿਸਤਾਨ ਦੇ ਲੋਕਾਂ ਵਿੱਚ ਦਰਾੜ ਪਾ ਕੇ ਰੱਖਣਾ ਚਾਹੁੰਦੀ ਹੈ। ਉਹਨਾਂ ਕਿਹਾ ਕਿ ਦਿੱਲੀ ਦੀ ਚਾਹਤ ਅਤੇ ਕੋਸ਼ਿਸ਼ਾਂ ਦੇ ਉਲਟ ਜਾ ਕੇ ਸਿੱਖਾਂ ਨੇ ਪਿਛਲ਼ੇ ਕੁਝ ਸਮੇ ਤੋਂ ਪਾਕਿਸਤਾਨ ਦੇ ਲੋਕਾਂ ਨਾਲ ਆਪਸੀ ਸਭਿਆਚਾਰਕ ਸਾਂਝ ਅਤੇ ਰਿਸ਼ਤੇ ਮਜਬੂਤ ਬਣਾਏ ਹਨ, ਜੋ ਹਿੰਦੁਸਤਾਨ ਦੇ ਹੁਕਮਰਾਨਾਂ ਨੂੰ ਲੰਮੇ ਸਮੇ ਤੋਂ ਚੁੱਭ ਰਹੇ ਹਨ।
ਭਾਰਤੀ ਲੀਡਰਸ਼ਿਪ ਉਤੇ ਇੱਕ ਤੀਰ ਨਾਲ ਕਈ ਨਿਸ਼ਾਨੇ ਲਾਉਣ ਦਾ ਦੋਸ਼ ਲਾਉਦਿਆਂ ਉਹਨਾਂ ਕਿਹਾ ਕਿ ਸਿਫਤੀ ਦੀ ਨਗਰੀ ਅੰਮ੍ਰਿਤਸਰ ਸ਼ਹਿਰ ਤੋਂ ਅਫਗਾਨਿਸਤਾਨ ਦਾ ਮੋਢਾ ਵਰਤ ਕੇ ਭਾਰਤੀ ਲੀਡਰਸ਼ਿਪ ਨੇ ਪਾਕਿਸਤਾਨ ਪ੍ਰਤੀ ਆਪਣੀ ਨਫਰਤ ਤੇ ਭੜਾਸ ਕੱਢੀ ਹੈ ਪਰ ਦੁੱਖ ਦੀ ਗੱਲ ਕਿ ਸਿੱਖਾਂ ਨੂੰ ਇਸ ਵਿੱਚ ਜਾਣਬੁੱਝ ਕੇ ਲਪੇਟਿਆ ਗਿਆ ਹੈ।
ਇਸ ਖ਼ਬਰ ਨੂੰ ਅੰਗ੍ਰੇਜ਼ੀ ਵਿਚ ਪੜ੍ਹਨ ਲਈ:
ਉਹਨਾਂ ਕਿਹਾ ਕਿ ਬਾਦਲ ਸਾਹਿਬ ਅਤੇ ਉਹਨਾਂ ਦਾ ਅਕਾਲੀ ਦਲ ਹਿੰਦੁਤਵ ਤਾਕਤਾਂ ਦੇ ਹੱਥਾਂ ਦਾ ਦਸਤਾ ਬਣਕੇ ਆਪਣੀ ਹੀ ਕੌਮ ਦੇ ਹਿੱਤਾਂ ਨੂੰ ਵੱਢ ਰਿਹਾ ਹੈ। ਉਹਨਾਂ ਸਿਰਦਾਰ ਕਪੂਰ ਸਿੰਘ ਵਲੋਂ ਲਿਖੇ ਆਨੰਦਪੁਰ ਸਾਹਿਬ ਦੇ ਮਤੇ ਜਿਸ ਨੂੰ ਸ਼੍ਰੋਮਣੀ ਅਕਾਲੀ ਦਲ ਨੇ ਅਪਣਾਇਆ ਸੀ, ਦਾ ਹਵਾਲਾ ਦੇਂਦਿੰਆਂ ਕਿਹਾ ਕਿ ਉਸ ਵਿੱਚ ਇਹ ਮੱਦ ਸ਼ਾਮਿਲ ਸੀ ਕਿ “ਇਹ ਜ਼ਰੂਰੀ ਨਹੀਂ ਕਿ ਜਿਸ ਮੁਲਕ ਨਾਲ ਹਿੰਦੁਸਤਾਨ ਦੀ ਦੋਸਤੀ (ਰੂਸ ਵੱਲ ਇਸ਼ਾਰਾ ਕੀਤਾ ਗਿਆ ਸੀ) ਹੋਵੇ ਉਸ ਨਾਲ ਸਿੱਖ ਵੀ ਦੋਸਤੀ ਕਰਨ ਅਤੇ ਜਿਸ ਮੁਲਕ ਨਾਲ ਹਿੰਦੁਸਤਾਨ ਦੀ ਦੁਸ਼ਮਣੀ (ਪਕਿਸਤਾਨ ਵੱਲ ਇਸ਼ਾਰਾ ਸੀ) ਹੋਵੇ ਉਸ ਨਾਲ ਸਿੱਖ ਵੀ ਦੁਸ਼ਮਣੀ ਰੱਖਣ”।
