ਔਕਲੈਂਡ. ਨਿਊਜ਼ੀਲੈਂਡ (25 ਸਤੰਬਰ, 2014): ਨਿਉਜ਼ੀਲੈਂਡ ਵਿੱਚ ਹੋਈਆਂ ਆਮ ਚੋਣਾਂ ਵਿੱਚ ਦੋ ਸਿੱਖਾਂ ਦੇ ਪਾਰਲੀਮੈਂਬਰ ਚੁਣੇ ਜਾਣ ਦੀ ਜਾਣਕਾਰੀ ਪ੍ਰਾਪਤ ਹੋਈ ਹੈ।ਮਿਲੀਆਂ ਖ਼ਬਰਾਂ ਅਨੁਸਾਰ ਸ੍ਰ. ਕੰਵਲਜੀਤ ਸਿੰਘ ਬਖ਼ਸੀ ਅਤੇ ਡਾ. ਪਰਮਜੀਤ ਕੌਰ ਪਰਮਾਰ ਨਿਊਜ਼ੀਲੈਂਡ ਦੇ 121 ਮੈਂਬਰੀ ਹਾਊਸ ਵਿੱਚ ਥਾਂ ਬਨਾਉਣ ਵਿੱਚ ਕਾਮਯਾਬ ਹੋ ਗਏ ਹਨ।
ਇਨਾਂ ਚੋਣਾਂ ਵਿੱਚ ਕੰਵਲਜੀਤ ਸਿੰਘ ਅਤੇ ਪਰਮਜੀਤ ਕੌਰ ਨੇ ਸੱਤਾਧਾਰੀ ਨੈਸ਼ਨਲ ਪਾਰਟੀ ਦੀਆਂ ਟਿਕਟਾਂ ‘ਤੇ ਚੋਣਾਂ ਲੜੀਆਂ ਸਨ, ਅਤੇ ਇਨ੍ਹਾਂ ਚੋਣਾਂ ਵਿੱਚ ਇਸ ਪਾਰਟੀ ਨੇ ਹੀ ਜਿੱਤ ਪ੍ਰਾਪਤ ਕੀਤੀ ਹੈ।
ਸ੍ਰ. ਕੰਵਲਜੀਤ ਸਿੰਘ ਤੀਜੀਵਾਰ ਨਿਊਜ਼ੀਲੈਡ ਪਾਰਲੀਮੈਂਟ ਹਾਊਸ ਦੇ ਮੈਂਬਰ ਚੁਣੇ ਗਏ ਹਨ ਜਦਕਿ ਪਰਮਜੀਤ ਕੌਰ ਨੇ ਪਹਿਲੀ ਵਾਰ ਚੋਣ ਜਿੱਤ ਕੇ ਆਪਣੇ ਰਾਜਸੀ ਜੀਵਨ ਦੀ ਸ਼ੁਰੂਆਤ ਕੀਤੀ ਹੈ।
ਸੰਨ 2001ਵਿੱਚ ਆਪਣੇ ਪਰਿਵਾਰ ਸਮੇਤ ਨਿਊਜ਼ੀਲੈਂਡ ਆ ਕੇ ਵੱਸੇ ਸ੍ਰ. ਕੰਵਲਜੀਤ ਸਿੰਘ 2008 ਵਿੱਚ ਚੋਣ ਲੜਕੇ ਨਿਊਜ਼ੀਲੈਨਡ ਦੇ ਪਹਿਲੇ ਸਿੱਖ ਅਤੇ ਏਸ਼ੀਅਨ ਪਾਰਲੀਮੈਂਟ ਮੈਂਬਰ ਬਣੇ।
ਇਨ੍ਹਾਂ ਚੋਣਾਂ ਵਿੱਚ ਪ੍ਰਧਾਨ ਮੰਤਰੀ ਜੋਹਨ ਕੀ ਦੀ ਅਗਵਾਈ ਵਿੱਚ ਨੈਸ਼ਨਲ ਪਾਰਟੀ ਨੇ 61 ਸੀਟਾਂ ‘ਤੇ ਜਿੱਤ ਪ੍ਰਾਪਤ ਕੀਤੀ ਜਦਕਿ ਪਿਛਲੀਆਂ ਚੋਣਾਂ ਵਿੱਚ ਨੈਸਨਲ ਪਾਰਟੀ ਨੂੰ 59 ਸੀਟਾਂ ਮਿਲੀਆਂ ਸਨ।
ਸੰਨ 1995 ਵਿੱਚ ਭਾਰਤ ਤੋਂ ਇੱਥੇ ਪਹੁੰਚੀ ਡਾ ਪਰਮਜੀਤ ਕੌਰ ਪਰਮਾਰ ਇਸ ਵੇਲੇ ਔਕਲੈਂਡ ਵਿੱਚ ਰਹਿ ਰਹੀ ਹੈ ਅਤੇ ਉਸਨੇ ਔਕਲੈਂਡ ਯੂਨੀਵਰਸਿਟੀ ਤੋਂ ਹੀ ਬਾਇਉ ਸਾਇੰਸ ਵਿੱਚ ਪੀਐੱਚਡੀ ਦੀ ਡਿਗਰੀ ਪ੍ਰਾਪਤ ਕੀਤੀ ਹੋਈ ਹੈ।
