ਚੰਡੀਗੜ੍ਹ – ਚੰਡੀਗੜ੍ਹ ਦੀ ਇੱਕ 18 ਵਰ੍ਹਿਆਂ ਦੀ ਲਿਖਾਰਨ ਵੱਲੋਂ ਲਿਖੀ ਗਈ ਨਵੀਂ ਕਿਤਾਬ ਨੇ ਪੰਜਾਬ ਦੇ ਪਿੰਡਾਂ ਅਤੇ ਕਿਸਾਨੀ ਜੀਵਨ ਦੀਆਂ ਅਣਗੌਲੀਆਂ ਹਕੀਕਤਾਂ ਨੂੰ ਮੁੱਖ ਧਾਰਾ ਵਿੱਚ ਲਿਆਉਣ ਦਾ ਯਤਨ ਕੀਤਾ ਹੈ। ‘ਨੋ ਵਨ ਹਰਡ ਦ ਹਾਰਵੈਸਟ ਕਰਾਈ’ (No One Heard The Harvest Cry) ਨਾਂ ਦੀ ਇਹ ਕਿਤਾਬ ਪਿਛਲੇ ਛੇ ਦਹਾਕਿਆਂ ਦੌਰਾਨ ਪੰਜਾਬ ਦੇ ਕਿਸਾਨੀ ਭਾਈਚਾਰੇ ਦੇ ਹੱਡ-ਬੀਤੀਆਂ ਤਜਰਬਿਆਂ ਦਾ ਦਸਤਾਵੇਜ਼ ਹੈ।
ਬਾਰ੍ਹਵੀਂ ਜਮਾਤ ਦੀ ਵਿਦਿਆਰਥਣ ਇਰਮ ਕੌਰ ਪੰਨੂ ਨੇ ਇਸ ਕਿਤਾਬ ਵਿੱਚ ਪੀੜਤਾਂ ਨਾਲ ਮੁਲਾਕਾਤਾਂ ਅਤੇ ਜ਼ਮੀਨੀ ਹਕੀਕਤਾਂ ਨੂੰ ਅਧਾਰ ਬਣਾਇਆ ਹੈ। ਲਿਖਾਰਨ ਮੁਤਾਬਕ, ਇਹ ਲਿਖਤ “ਉਨ੍ਹਾਂ ਕਿਸਾਨਾਂ, ਪਰਿਵਾਰਾਂ ਅਤੇ ਪੇਂਡੂ ਨੌਜਵਾਨਾਂ ਦੀ ਆਵਾਜ਼ ਨੂੰ ਸਾਂਭਣ ਦਾ ਉਪਰਾਲਾ ਹੈ, ਜਿਨ੍ਹਾਂ ਦੇ ਸੰਘਰਸ਼ ਅਕਸਰ ਦੁਨੀਆ ਦੀ ਨਜ਼ਰ ਤੋਂ ਓਹਲੇ ਰਹਿ ਜਾਂਦੇ ਹਨ।”
ਲਿਖਾਰਨ ਅਨੁਸਾਰ, ਇਹ ਕਿਤਾਬ ਕਰਜ਼ੇ, ਉਜਾੜੇ, ਮਾਨਸਿਕ ਸਿਹਤ ਅਤੇ ਵਾਤਾਵਰਨ ਦੇ ਵਿਗਾੜ ਵਰਗੇ ਗੰਭੀਰ ਮਸਲਿਆਂ ਦੀ ਪੜਚੋਲ ਕਰਦੀ ਹੈ। ਇਸ ਵਿੱਚ ਸਰਕਾਰੀ ਨੀਤੀਆਂ ਦੀਆਂ ਖਾਮੀਆਂ ਕਾਰਨ ਪਰਿਵਾਰਾਂ ‘ਤੇ ਪਏ ਸਮਾਜਿਕ ਅਸਰਾਂ ਅਤੇ ਪੀੜ੍ਹੀ-ਦਰ-ਪੀੜ੍ਹੀ ਚੱਲ ਰਹੇ ਦੁੱਖਾਂ ਦੀ ਗੱਲ ਕੀਤੀ ਗਈ ਹੈ। ਦੁਸ਼ਵਾਰੀਆਂ ਦੇ ਨਾਲ-ਨਾਲ, ਇਰਮ ਕੌਰ ਨੇ ਪੰਜਾਬ ਦੀ ਕਿਸਾਨੀ ਦੇ ਉਸ ‘ਸਿਦਕ’ ਨੂੰ ਵੀ ਉਭਾਰਿਆ ਹੈ ਜੋ ਅੱਜ ਵੀ ਉਨ੍ਹਾਂ ਦੀ ਪਛਾਣ ਹੈ।
ਇਰਮ ਕੌਰ ਨੇ ਦੱਸਿਆ ਕਿ ਇਹ ਕਿਤਾਬ ਖਾਸ ਤੌਰ ‘ਤੇ ਨੌਜਵਾਨ ਪਾਠਕਾਂ, ਅਧਿਆਪਕਾਂ ਅਤੇ ਹਰ ਉਸ ਸ਼ਖ਼ਸ ਲਈ ਲਿਖੀ ਗਈ ਹੈ ਜੋ ਭਾਰਤ ਦੇ ਖੇਤੀ ਸੰਕਟ ਪਿੱਛੇ ਛੁਪੇ ਮਨੁੱਖੀ ਦਰਦ ਨੂੰ ਡੂੰਘਾਈ ਨਾਲ ਸਮਝਣਾ ਚਾਹੁੰਦਾ ਹੈ।
ਇਹ ਕਿਤਾਬ ਐਮਾਜ਼ਾਨ ‘ਤੇ ਪ੍ਰਾਪਤ ਕੀਤੀ ਜਾ ਸਕਦੀ ਹੈ।