ਐਡੀਲੇਡ: ਪੰਜਾਬ ਦੇ ਨਕੋਦਰ ਦੀ ਰਹਿਣ ਵਾਲੀ ਦਲਜੀਤ ਕੌਰ ਸੰਘੇੜਾ ਨੂੰ ਸਾਊਥ ਆਸਟਰੇਲੀਆ ਵਿੱਚ ਸਖ਼ਤ ਮਿਹਨਤ ਅਤੇ ਦ੍ਰਿੜ ਇਰਾਦੇ ਨਾਲ ਖੇਤੀਬਾੜੀ ਕਰਨ ਕਰਕੇ ਸਫਲ ਕਿਸਾਨ ਹੋਣ ਦਾ ਮਾਣ ਹਾਸਲ ਹੋਇਆ ਹੈ। ਉਸ ਨੂੰ ਰਿਵਰਲੈਂਡ ਕਮਿਊਨਿਟੀ ਵੱਲੋਂ ਸਫ਼ਲ ਕਿਸਾਨ ਦੇ ਤੌਰ ‘ਤੇ ‘ਵੋਮੈਨ ਆਫ ਦਾ ਯੀਅਰ’ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ ਹੈ। ਬੀਬੀ ਸੰਘੇੜਾ ਤੀਹ ਸਾਲ ਪਹਿਲਾਂ ਆਸਟਰੇਲੀਆ ਦੇ ਸ਼ਹਿਰ ਮੈਲਬਰਨ ਵਿੱਚ ਵਿਆਹੀ ਆਈ ਸੀ। ਇਥੇ ਕੁੱਝ ਸਮਾਂ ਰਹਿਣ ਮਗਰੋਂ ਉਨ੍ਹਾਂ ਦੇ ਪਤੀ ਨੇ ਸਾਊਥ ਆਸਟਰੇਲੀਆ ਦੇ ਪੇਂਡੂ ਇਲਾਕੇ ਰਿਵਰਲੈਂਡ ਨੇੜੇ ਲੁਕਸਟਨ ਵਿਖੇ ਕੁੱਝ ਜ਼ਮੀਨ ਖਰੀਦੀ ਅਤੇ ਖੇਤੀ ਸ਼ੁਰੂ ਕੀਤੀ। ਪਰ ਕੁੱਝ ਸਾਲਾਂ ਬਾਅਦ ਹੀ ਉਸ ਦੇ ਪਤੀ ਦੀ ਇਕ ਹਾਦਸੇ ਵਿੱਚ ਮੌਤ ਹੋ ਗਈ। ਇਸ ਬਾਅਦ ਬੀਬੀ ਸੰਘੇੜਾ ਲਈ ਤਿੰਨ ਬੱਚਿਆਂ ਦੀ ਸਾਂਭ ਸੰਭਾਲ ਨਾਲ ਖੇਤੀਬਾੜੀ ਕਰਨਾ ਇਕ ਵੱਡੀ ਚੁਣੌਤੀ ਸੀ।
ਬੀਬੀ ਸੰਘੇੜਾ ਨੇ ਦੱਸਿਆ ਕਿ ਉਸ ਨੇ ਕਿਸੇ ‘ਤੇ ਨਿਰਭਰ ਹੋਣ ਤੇ ਹਾਲਾਤ ਨਾਲ ਸਮਝੌਤਾ ਕਰਨ ਦੀ ਬਜਾਏ ਸੰਘਰਸ਼ ਵਾਲਾ ਰਾਹ ਚੁਣਿਆ ਅਤੇ ਇਕ ਮਾਂ ਦੇ ਫ਼ਰਜ ਨੂੰ ਨਿਭਾਉਦਿਆਂ ਦ੍ਰਿੜ ਇਰਾਦੇ, ਸਹਿਜਤਾ ਤੇ ਲਗਨ ਨਾਲ ਬੱਚਿਆਂ ਦੀ ਸੰਭਾਲ ਦੇ ਨਾਲ ਨਾਲ ਖੇਤੀਬਾੜੀ ਦਾ ਕੰਮ ਦਲੇਰੀ ਨਾਲ ਸੰਭਾਲਿਆ। ਹੁਣ ਉਹ ਸੰਤਰੇ ਅਤੇ ਅੰਗੂਰਾਂ ਦੇ ਵੱਡੇ ਫਾਰਮ ਦੀ ਮਾਲਕ ਹੈ। ਖੇਤੀਬਾੜੀ ਨਾਲ ਸਬੰਧਤ ਮਸ਼ੀਨਰੀ ਦੀ ਵੀ ਉਹ ਖੁ਼ਦ ਹੀ ਵਰਤੋਂ ਕਰਦੀ ਹੈ। ਬੀਬੀ ਸੰਘੇੜਾ ਰਿਵਰਲੈਂਡ ਕਮਿਊਨਿਟੀ ਦੀ ਵਿਸ਼ੇਸ਼ ਮੈਂਬਰ ਵੀ ਹੈ। ਉਨ੍ਹਾਂ ਦੇ ਤਿੰਨ ਬੱਚੇ ਹਨ ਸਕੂਲ ਜਾਂਦੇ ਹਨ। ਇਥੋਂ ਦੇ ਲੇਖਕ ਲੀਜ ਹਰਫੁਲ ਵੱਲੋਂ ਦਲਜੀਤ ਕੌਰ ਸੰਘੇੜਾ ਦੇ ਜੀਵਨ ਉਪਰ ਕਿਤਾਬ ਲਿਖੀ ਗਈ ਹੈ। ਬੀਬੀ ਦਲਜੀਤ ਕੌਰ ਸੰਘੇੜਾ ਆਸਟਰੇਲੀਅਨ ਔਰਤਾਂ ਦਾ ਆਦਰਸ਼ ਬਣ ਗਈ ਹੈ।
